Gürcüstanda cinayətkarlıq artıb

Gürcüstanda cari ilin yanvar-may aylarında qeydə alınmış cinayətlərin sayı 2018-ci ilin eyni dövrü ilə müqayisədə 19,3 faiz artaraq 28 min 300 min fakt təşkil edib.
AZƏRTAC xəbər verir ki, bu barədə Gürcüstan Daxili İşlər Nazirliyinin saytında yerləşdirilmiş materialda məlumat verilir.
Məlumata görə, bu cinayətlərin yalnız 29,6 faizinin üstü açılıb. Cinayətlər sırasında oğurluq birinci yerdədir. Hesabat dövründə ölkədə 9263 oğurluq faktı qeydə alınıb ki, bu da 2018-ci ilin yanvar-may ayları ilə müqayisədə 24,1 faiz çoxdur. İkinci yerdə ailə zorakılığı hallarıdır, hesabat dövründə 3278 belə fakt qeydə alınıb (2018-ci ilin ilk 5 ayı ilə müqayisədə 12,1 faiz artım). Narkotiklərlə əlaqədar cinayətlərin sayı da 36,6 faiz artaraq 2341 fakt olub. Hesabat dövründə nəqliyyat vasitələri ilə əlaqədar qeydə alınmış cinayətlərin sayı keçən ilin eyni dövrü ilə əlaqədar 1,9 faiz azalaraq 483 fakt təşkil edib. Siyahıda ilk beşliyi özünü öldürmə halına gətirib çıxarma ilə bağlı cinayətlər tamamlayır. Hesabat dövründə 993 özünü öldürmə hallarına çatdırma cinayət faktı qeydə alınıb, bu da 2018-ci ilin eyni dövrü ilə müqayisədə 23,2 faiz çoxdur.
Bundan başqa, hesabat dövründə səlahiyyət həddini aşmağa görə 127, rüşvətxorluğa görə 36, vəzifə səhlənkarlığına görə 28 və vəzifə səlahiyyətlərindən sui-istifadəyə görə 38 cinayət faktı qeydə alınıb. Cari ilin ilk beş ayında kompüter cinayətlərinin sayı 177,7 faiz, istehsalat fəaliyyəti qaydalarının pozulması ilə bağlı cinayətlərin sayı 83,3 faiz, təhlükələrin sayı isə 45 faiz artıb.
Baş Nazir Mamuka Baxtadze deyib ki, Gürcüstanda cinayətlərin sayı artmayıb.
Onun sözlərinə görə, 2012-ci ildə “Gürcü arzusu-demokratik Gürcüstan” partiyası hakimiyyətə gələndən sonra cinayətlərin qeydiyyatı prosesi yaxşılaşıb. Qeydiyyat daha dəqiq, şəffaf və konkret aparılır: “Bu məsələdə də Gürcüstan beynəlxalq standartlara yaxınlaşır”, - deyə Baş Nazir vurğulayıb.