“Gürcüstan Avropaya inteqrasiya prosesini dayandırmayıb. Avrointeqrasiya xarici siyasətimizin əsas istiqamətidir”.
Teleqraf-ın yerli bürosu xəbər verir ki, bunu Gürcüstanın xarici işlər naziri Maka Boçorişvili jurnalistlərə açıqlamasında deyib.
Onun sözlərinə görə, Gürcüstan nümayəndələrini Avropa İttifaqı çərçivəsində planlaşdırılan tədbirlərə dəvət etmirlər, sonra isə manipulyativ olaraq informasiya yayılır ki, guya Gürcüstan həmin tədbirlərdə iştirak etmir.
“Gürcüstan heç bir şəkildə avrointeqrasiyanı dayandırmayıb. Biz görürük ki, avropalı tərəfdaşlarımız Avropaya inteqrasiya prosesini siyasi alət kimi istifadə edirlər”, - XİN başçısı söyləyib.
Gürcüstanın Baş naziri İrakli Kobaxidze də jurnalistlərə açıqlama verərək bildirib ki, ölkənin avrointeqrasiyanı dayandırması barədə məlumatlar həqiqəti əks etdirmir.
“2030-cu ilə qədər Gürcüstan namizəd ölkələr arasında Avropa İttifaqına üzv olmağa ən çox hazır olan ölkə olacaq”, - Baş nazir əlavə edib.
Xatırladaq ki, ötən ilin noyabrın 28-də Gürcüstan hökuməti Aİ-yə üzvlüklə bağlı danışıqları 2028-ci ilədək gündəmə gətirməyəcəyini bəyan edib.
