Ankarada rəsmi səfərdə olan Azərbaycan Respublikasının müdafiə naziri general-polkovnik Zakir Həsənov Türkiyə Respublikasının milli müdafiə naziri Yaşar Gülər ilə görüşüb.
Bu barədə Azərbaycan MN məlumat yayıb.
Xəbərə görə, görüşdən əvvəl general-polkovnik Zakir Həsənovun rəhbərlik etdiyi nümayəndə heyəti Ankarada Heydər Əliyev Parkını və Türkiyə Respublikasının banisi Mustafa Kamal Atatürkün mavzoleyini - Anıtqəbri ziyarət edib. Azərbaycan nümayəndə heyəti Ümummilli Lider Heydər Əliyevin parkdakı abidəsi və Mustafa Kamal Atatürkün məzarı önünə əklil qoyub, Ulu Öndərlərin xatirələrinə ehtiram nümayiş etdirib.
Sonra Türkiyə Respublikasının Milli Müdafiə Nazirliyində təntənəli qarşılama mərasimi olub, müdafiə nazirləri fəxri qarovulun önündən keçib, hər iki ölkənin dövlət himnləri səsləndirilib.
General-polkovnik Z.Həsənov protokola uyğun olaraq şərəf kitabını imzalayıb.
Nümayəndə heyətlərinin iştirakı ilə keçirilən görüşdə qonaqları salamlayan qardaş ölkənin milli müdafiə naziri onları Türkiyədə görməkdən məmnunluğunu bildirib. Cənab Y.Gülər ölkələrimiz arasında qarşılıqlı inam, etimad və dəstəyə əsaslanan əməkdaşlığın bundan sonra da uğurla inkişaf etdiriləcəyinə əminliyini ifadə edib.
Müdafiə naziri türkiyəli həmkarına göstərilən qonaqpərvərliyə görə minnətdarlığını bildirib. General-polkovnik Z.Həsənov Azərbaycan və Türkiyə dövlət başçılarının səmimi münasibətlərinin digər sahələrə olduğu kimi, hərbi əməkdaşlıq sahəsinə də müsbət təsir etdiyini vurğulayıb.
Azərbaycan Respublikasının Türkiyə Respublikasındakı səfiri Rəşad Məmmədovun da iştirak etdiyi görüşdə hərbi, hərbi-texniki, hərbi-təhsil və digər sahələrdə əməkdaşlığın inkişaf perspektivləri, regional təhlükəsizlik və qarşılıqlı maraq doğuran digər məsələlər müzakirə edilib.
Mövzu ilə əlaqədar “Sherg.az”a danışan hərbi ekspert Ədalət Verdiyev bildirib ki, Azərbaycan və Türkiyə arasında hərbi səfərlər Şuşa bəyannaməsinin tələbindən irəli gələn fəaillətlərdir:
“Bu səfərlər isə qarşılıqlı olaraq son illərdə kifayət qədər intensivləşib. Hesab edirəm ki, Türkiyə və Azərbaycan arasında daha əvvəl əldə edilən razılaşmalar fonunda Zakir Həsənovun səfəri mühüm əhəmiyyət daşıyır. Nəzərə alsaq ki, Azərbaycan bu il Türkiyə ilə birgə müdafiə sanayesi məhsulları üçün fabriklərin tikintisini nəzərdə tutur. Digər tərəfdən isə Türkiyə müdafiə sanayesinin istehsal etdiyi ən son nailiyyətlər Azərbaycan üçün də əlçatandır. Həmçinin “Akıncı” pilotsuz uçuş aparatlarını (PUA) Azərbaycan əldə edib. Ona görə də belə səfərlər birmənalı olaraq Azərbaycan və Türkiyə arasındakı hərbi-texniki, hərbi-təhsil və digər sahələrdə əməkdaşlığın gücləndirilməsinə istiqamətlənib”.
