“Orta Dəhliz artıq alternativ yox, zərurətə çevrilir. Cəmi bir həftə əvvəl perspektivli marşrut kimi qiymətləndirilən Çin–Qazaxıstan–Azərbaycan–Gürcüstan-Türkiyə–Avropa xətti, İran ətrafında gərginlik və Hörmüz boğazının bağlanması riskindən sonra bir çox ticarət şirkətləri üçün faktiki olaraq “yaşamaq marşrutu”na çevrilib”.
Bu fikirlər nəqliyyat və logistika məsələləri üzrə mütəxəssis Rauf Ağamirzəyevə məxsusdur.
Sherg.az-a açıqlamasında ekspert bildirdi ki, son 7 gündə bu marşrut üzrə konteyner daşımalarına tələbat ötən ilin eyni dövrü ilə müqayisədə 450–500% artıb:
- Aktau və Bakı limanlarında yük axını kəskin artdığı üçün emal müddəti 3 dəfə uzanıb. Orta Dəhlizlə çatdırılma müddəti: təxminən 15 gün, ənənəvi dəniz yolu ilə isə 45–55 gündür. Gərginlikdən sonra investorların “İnkişaf Yolu” layihəsinə marağı da artıb. İraqdakı Grand Faw limanının planlaşdırılan illik tutumu 30 milyon tona qədər yenidən qiymətləndirilir. Bakı–Tbilisi–Qars xətti artıq demək olar ki, fiziki həddə çatıb. Son bir həftədə daşımalar 35% artıb, sərhədlərdə qatar növbələri isə bir neçə kilometrə qədər uzanıb. Geosiyasət bir daha göstərir ki, logistika marşrutları təkcə iqtisadi deyil, həm də strateji məsələdir.
