Şanxay Əməkdaşlıq Təşkilatının (ŞƏT) sammitində 20-dən çox ölkənin liderləri iştirak edəcək.
Teleqraf xəbər verir ki, bu barədə Çin xarici İşlər nazirinin köməkçisi Liu Bin bildirib.
Rəsmi sammitə Azərbaycan Prezidenti İlham Əliyevin də dəvət olunduğunu açıqlayıb.
“Çin sədri Si Cinpin 20-dən çox xarici lider və 10 beynəlxalq təşkilatın rəhbəri ilə Hayhe çayının sahilində bir araya gələcək. Tədbirə Azərbaycan, Rusiya, Belarus, Hindistan, İran, Türkiyə, Qazaxıstan, Qırğızıstan, Pakistan, Tacikistan, Özbəkistan, Monqolustan, Ermənistan, Kamboca, Maldiv Adaları, Nepal, Misir, Türkmənistan, İndoneziya, Laos, Malayziya və Vyetnam liderləri dəvət olunub”, - o qeyd edib.
Liu Binin sözlərinə görə, iştirakçılar ŞƏT-in uğurlu təcrübəsini müzakirə edəcək, təşkilatın inkişaf istiqamətlərini müəyyənləşdirəcək, əməkdaşlıq məsələləri üzrə razılaşma əldə edəcəklər.
Qeyd edək ki, Şanxay Əməkdaşlıq Təşkilatının sammiti avqustun 31-dən sentyabrın 1-dək Çinin Tyantszin şəhərində keçiriləcək.
ReAL Partiyasının sədri, iqtisadçı Natiq Cəfərli “Sherg.az”a bildirdi ki, Şanxay Əməkdaşlıq Təşkilatı (ŞƏT) müasir beynəlxalq münasibətlər sistemində iqtisadi, siyasi və logistik baxımdan strateji əhəmiyyət daşıyan regional təşkilatlardan biri kimi çıxış edir:
“Bu qurumun iqtisadi və demoqrafik potensialı müqayisəli şəkildə götürüldükdə, Avropa İttifaqı ölkələrinin ümumi potensialını geridə qoyması diqqətəlayiqdir. Azərbaycanın bu təşkilat çərçivəsində əməkdaşlıq imkanlarının genişləndirilməsi, xüsusilə ticarət, investisiya və nəqliyyat sahələrində yeni imkanlar yaratmaqla ölkə iqtisadiyyatına mühüm töhfə verə bilər. Azərbaycan üçün əsas prioritet istiqamətlərdən biri logistika və yeni beynəlxalq nəqliyyat marşrutlarının formalaşdırılmasıdır. ŞƏT-ə daxil olan dövlətlər, xüsusilə Çin Xalq Respublikası, bu sahədə əsas strateji tərəfdaş rolunu oynayır.
Əlavə olaraq qeyd etmək lazımdır ki, təşkilat daxilində iqtisadi inteqrasiyanın dərinləşdirilməsi Azərbaycanın beynəlxalq ticarət şəbəkələrində mövqelərinin güclənməsinə şərait yaradır. Bununla yanaşı, ŞƏT çərçivəsində enerji resurslarının nəqli, rəqəmsal infrastrukturun inkişafı və qarşılıqlı investisiya mübadiləsi kimi sahələrdə də əməkdaşlıq imkanları mövcuddur. Azərbaycanın coğrafi mövqeyi Orta Asiya, Qafqaz və Avropa arasında tranzit körpüsü funksiyasını gücləndirərək, ölkənin strateji əhəmiyyətini artırır. Bu baxımdan, Azərbaycanın təşkilatla əlaqələrinin dərinləşdirilməsi regionda dayanıqlı inkişaf, təhlükəsizlik və iqtisadi inteqrasiya baxımından da mühüm nəticələr doğura bilər. Beləliklə, ŞƏT ilə əməkdaşlıq Azərbaycanın qlobal iqtisadi sistemdə rolunun güclənməsinə və uzunmüddətli inkişaf strategiyasının reallaşdırılmasına xidmət edir”.
