Azərbaycan Mərkəzi Bankı (AMB) növbəti dəfə uçot dərəcəsini azalda biləcəyini açıqlayıb.
"APA-Economics" xəbu barədə AMB-nin pul siyasəti qərarı ilə bağlı açıqlamasında bildirilib. Qeyd edilib ki, ümumilikdə, mövcud pul siyasəti inflyasiyanın hədəf daxilində saxlanılmasına və inflyasiya gözləntilərinin sabitləşməsinə yönəlib. İnflyasiyanın xarici mühitində qeyri-müəyyənliklərin azalması növbəti iclasda uçot dərəcəsinin azaldılması üçün zəmin yarada bilər.
Qeyd edək ki, faiz dəhlizinin parametrləri ilə bağlı növbəti qərar bu il iyul ayının 23-də veriləcək.
Məsələ ilə bağlı "Sherg.az"a danışan iqtisadçı ekspert, Natiq Cəfərli bildirib ki, uçot dərəcəsinin azaldılması iqtisadiyyata birbaşa və dərhal təsir göstərməsə də, dolayı yolla kredit faizlərinə təsir edir:
“Azərbaycanda maliyyə sistemi spesifik xüsusiyyətlərə malik olduğundan, bu təsirin iqtisadiyyata ötürülməsi zaman alır. Mərkəzi Bank inflyasiya gözləntiləri yaxşılaşdıqca faiz dərəcələrini aşağı sala bilər ki, bu da kredit şərtlərini yumşalda bilər. Lakin bu dəyişikliklərin iqtisadi fəallığa təsiri dərhal deyil, mərhələli şəkildə baş verir. Uçot dərəcəsinin azaldılması bank sektorunda likvidliyin artmasına və kreditləşmənin genişlənməsinə səbəb ola bilər. Bu isə son nəticədə istehlak və investisiyalara müsbət təsir göstərə bilər. Ancaq bu təsir dərəcəsi yalnız monetar siyasət deyil, eyni zamanda bankların davranışı və bazar iştirakçılarının gözləntiləri ilə də bağlıdır”.
