“Aqroparkların işsizliyin aradan qaldırılması ilə ciddi əlaqəsi yoxdur. Təbii ki, əmək məhsuldarlığına, istehsal qüvvəsinə görə aqroparklar daha çox məhsul verərlər, nəinki ənənəvi fermer təsərrüfatları. Lakin hər kəs bilir ki, kənd təsərrüfatında fermer, ailə təsərrüfatları məşğulluğa daha çox xidmət
edir”.
Bu barədə “Sherg.az”a iqtisadçı-ekspert Nazim Bəydəmirli bildirib. Onun sözlərinə görə, məşğul əhali hesab olunan əhalimizin təqribən belə hesab olunur ki, kənddə yaşayanların mütləq əksəriyyəti kənd təsərrüfatı istehsalı ilə məşğul olurlar:
“Belə hesab olunur ki, kənd əhalisinin mütləq əksəriyyəti kənd təsərrüfatı istehsalı ilə məşğul olurlar”.
İqtisadçının sözlərinə görə aqroparklar daha çox məmur sahibkarlarına, holdinqlərə aiddir:
“Onların bu və ya digər formada məşğulluqla bağlı məsələləri həll etməyə gücü, qüdrəti yoxdur. Bu səbəbdən aqrar sektorda qərbdə olduğu kimi daha çox fermer, ailə təsərrüfatlarının məmur sahibkarlığına
məxsus rolu var. Eyni zamanda kənd yerlərində yaşayan əhalinin bu işlərə cəlb edilməsi, onlara təbliğ olunması, faizsiz kreditlərin, texniki dəstəyin verilməsi daha məqbul sayılardı. Məşğulluqla bağlı sosial
yükünü azalda bilərdi”.
Ekspertin qənaətincə, bazarlarda, marketlərdə xarici istehsalçılardan asılı vəziyyətə düşürük:
“Ölkəyə idxal olunan məhsulların miqdarı artır. Daha sonra alış-veriş edərkən görürük ki, məsələn 36 mal alınırsa, onun ən azı 25-27-si xarici ölkələrdə istehsal olunmuş məhsullardır. Daxili istehsal kimi təqdim
olunan, alınan müxtəlif şəkər tozu, un məmulatlarının xammalı xarici ölkələrdən gətirilir.
Belə demək mümkündürsə, son illərdə kənd təsərrüfatı ilə bağlı aparılan “dırnaqarası” islahatlar mənfi nəticələnib.
Bunun səbəbi isə kənd əhalisinin öz yaşayış yerlərində yaşamaması, müxtəlif səbəblərdən, işsizlikdən, o cümlədən kommunal xidmətlərin əlçatmaz olması, onların şəhərlərə miqrasiya etməsindən doğan
problemlərdir. Hər bir Azərbaycan ailəsi bunu bilir”.
N.Bəydəmirli diqqətə çatdırıb ki, təqribən 4 milyon 500 min əhali kənd yerlərində qeydiyyatdadır:
“Bunların 60-70 faizi daimi yaşayış olduğu yerlərdə yaşamırlar. Deməli, onlar kənd təsərrüfatı ilə məşğul olmur və məşğul əhali kateqoriyasına da aid deyillər. Hesab edirəm ki, bu sahədə islahatlar məmur sahibkarlığının ləğvindən, sahibkarlığa real dəstəkdən, rəqabət mühitinin saflaşdırılmasından keçir. Sahə üzrə problemlər həll olmayacağı təqdirdə heç bir nəticə əldə etmək mümkün deyil”.
