Kişilərin bir çoxu ayaqüstə sidiyə getməyi kişilik əlaməti hesab edir. Lakin Şərq və Asiya ölkələrində kişilər arasında oturaraq sidiyə getmək daha geniş yayılıb. Burada söhbət təkcə tualet vərdişlərindən deyil, həm də sağlamlıqdan gedir. Bəs sidiyə hansı vəziyyətdə getməyin orqanizm üçün fərqi varmı?
Oturaraq sidiyə getməyin lehinə arqumentlər
Sherg.az-ın məlumatına görə, 2014-cü ildə aparılan araşdırmalar göstərib ki, prostat vəzi böyümüş və ya sidik yollarında digər problemləri olan kişilərin oturaraq sidiyə getməsi daha məqsədəuyğundur. Çünki bu vəziyyət çanaq dibi əzələlərinin boşalmasına və sidik kisəsinin daha yaxşı boşalmasına kömək edir.
Əksinə, mütəmadi olaraq ayaqüstə sidiyə getmək, xüsusilə də bundan əvvəl sidiyi uzun müddət saxlamaq, sidik kisəsinin tam boşalmamasına səbəb ola bilər. Bu isə xroniki xəstəliklərin yaranması və mövcud problemlərin kəskinləşməsi riskini artırır.
Ayaqüstə sidiyə getməyin lehinə arqumentlər
Sonrakı araşdırmalarda isə əks nəticələr də ortaya qoyulub. Belə ki, oturaraq sidiyə getməyin sidik ifrazından sonra damcılanma riskini artıra biləcəyi bildirilib. Bu nəticə 50 yaşadək kişilərlə bağlı olub.
2020-ci ildə təxminən 200 kişinin iştirakı ilə keçirilən sorğu da oturaraq sidiyə getməyin əleyhinə müəyyən arqumentlər ortaya qoyub. Araşdırmaya əsasən, bu üsula üstünlük verən kişilər sidik yolları ilə bağlı simptomlardan daha çox şikayət ediblər. Lakin həmin şəxslərdə problemlərin sorğudan əvvəl də mövcud olub-olmadığı dəqiqləşdirilməyib.
Uroloq Rena Malik xatırladıb ki, 50 yaşdan sonra kişilərdə prostat vəzinin böyüməsi riski artır və bu, sidik ifrazını çətinləşdirir. Onun sözlərinə görə, bəzi kişilərdə sidik axınının zəifləməsi ayaqüstə sidiyə getməyi və istiqaməti düzgün tənzimləməyi çətinləşdirir. Bu baxımdan oturmaq gigiyena baxımından daha rahat ola bilər. Bununla belə, hələlik bu fikirlər nəzəri mülahizələr olaraq qalır.
Yeni araşdırma nəyi üzə çıxarıb?
Kolumbiyalı uroloqlar qrupu məsələni yenidən araşdırmaq üçün 18-39 yaş arası 52 sağlam kişini tədqiqata cəlb edib. İştirakçıların həm oturaraq, həm də ayaqüstə sidiyə getməsi müşahidə olunub. Bu zaman sidik axınının maksimal sürəti və ifraz olunan sidiyin miqdarı ölçülüb.
İştirakçıların yarısı əvvəlcə oturaraq, sonra ayaqüstə, digər yarısı isə əks ardıcıllıqla sidiyə gedib. Hər iki vəziyyət arasında ən azı 24 saatlıq fasilə saxlanılıb.
Oktyabrın sonunda Neurourology and Urodynamics jurnalında dərc olunan araşdırmanın nəticələrinə görə, sağlam kişilərdə sidiyə getmə vəziyyəti sidik axınının maksimal sürətinə və ifraz olunan sidiyin həcminə əhəmiyyətli təsir göstərməyib.
Mütəxəssislər vurğulayırlar ki, nəticələr yalnız sağlam kişilərə aiddir. Sidik ifrazı ilə bağlı problem yaranıbsa və ya uroloji diaqnoz qoyulubsa, özbaşına qərar vermək əvəzinə həkimin tövsiyələrinə əməl etmək lazımdır.
Maraqlı fakt: Almaniya oturaraq sidiyə gedən kişilərin sayına görə liderdir
YouGov platformasının 2023-cü ildə 13 ölkədə keçirdiyi sorğuya əsasən, Almaniyada kişilərin 42 faizi oturaraq sidiyə getməyə üstünlük verir. Onların cəmi 10 faizi yalnız ayaqüstə sidiyə getdiyini bildirib.
Maraqlıdır ki, alman dilində oturaraq sidiyə gedən kişiləri aşağılayan Sitzpinkler sözü də mövcuddur. Bu ifadə təxminən “zəif kişi” mənasında işlədilir.
Rusiyada bununla bağlı statistik məlumat yoxdur. Lakin postsovet məkanında tualetlərdə oğlan və qız fiqurlarının müvafiq olaraq ayaqüstə və oturmuş vəziyyətdə təsvir edilməsi kişilərin oturaraq sidiyə getməsinin ənənəvi olaraq qəbul edilmədiyini göstərir.
