Ərzurumda 300 illik olduğu bildirilən tut ağacında zamanla əmələ gələn dərin çatlar, yerə oturmuş və başını aşağı salmış insan fiqurunu xatırladır.
Sherg.az xəbər verir ki, Ərzurumda bir tut ağacında zaman keçdikcə yaranan bu mənzərə məhəllə sakinlərini təəccübləndirib.
Oltu rayonuna bağlı Arıtaş kəndində yerləşən təxminən 300 illik tut ağacının gövdəsində yaranan insan silueti, həm yerli sakinləri, həm də bölgəni ziyarət edən təbiət sevərləri heyran qoyur.
Nəhəng tut ağacının gövdəsində illər ərzində əmələ gələn dərin yarıqlar, yerə oturmuş və başını aşağı salmış bir insan fiqurunu xatırladır.
Bu maraqlı təbii görüntü həm kənd camaatının, həm də əraziyə gələn qonaqların diqqətini çəkir.
Arıtaş kəndinin bələdiyyə başçısı (muxtarı) Halil Bektaş ağacın çox qədim tarixə malik olduğunu bildirib:
“Zaman keçdikcə gövdəsində əmələ gələn çatlar doğrudan da diqqətçəkici bir forma alıb. İlk baxışda elə bil kimsə ağacın içində oturub və başını aşağı salıb. Çox maraqlı bir görüntüdür. Biz də hər dəfə baxanda təəccüblənirik.”
Kənd sakinləri və ziyarətçilər bu təbii yaranmanın qorunması və tanıdılması gərəkdiyini bildiriblər. Sosial mediada paylaşılan görüntülər isə böyük maraq doğurub.
