ABŞ Milli Kəşfiyyatının rəhbəri Tulsi Qabbard yadplanetlilərin mövcud olması ehtimalından danışıb.
Teleqraf xəbər verir ki, bu barədə “Daily Star” məlumat yayıb.
T.Qabbard "Pod Force One" podkastında çoxlarının sensasiyalı hesab etdiyi bir açıqlama verdi. Aparıcının yadplanetlilərin mövcudluğu ehtimalına inanıb-inanmadığı sualına ABŞ milli kəşfiyyatının rəhbəri belə cavab verib: “Bəli. Mənim bu məsələ ilə bağlı öz görüşlərim və fikirlərim var. Amma belə bir mövqedə dediklərimdə diqqətli olmalıyam".
T.Qabbard əlavə edib ki, onun nəzarəti altında olan şöbələr UFO-lar haqqında həqiqəti axtarmağa davam edir və yenilikləri amerikalılarla mütləq bölüşəcəklər. O, etiraf edib ki, hələlik bu barədə açıq danışa bilmir, lakin hər şey “vaxt gələndə” açıqlanacaq.
UFO mövzusu ilə maraqlanan bir çox insan T.Qabbardın açıqlamalarını sensasiyalı adlandırdı, çünki o, yadplanetlilərin mövcudluğu sualına birmənalı mənfi cavab verməyən ilk yüksək rütbəli dövlət məmurudur.
O, ABŞ prezidenti Donald Trampın ən yaxın müşaviridir və onun üçün xüsusi xidmət orqanlarının işi ilə bağlı gündəlik məxfi hesabat hazırlayır.
