Bu gün tanınmış jurnalist Hidayət Elvüsal dünyasını dəyişib. Sherg.az xəbər verir ki, bu haqda məlumatı oğlu Samir verib.
Allah rəhmət eləsin!
1949-cu il iyun ayınınn 25-də Kəlbəcər rayonunda dünyaya göz açan Hidayət Elvüsal zaman-zaman bir sıra mətbu orqanlarda fəaliyyət göstərib. Kəlbəcərdə çıxan “Yenilik” rayon qəzetində, yerli radio verilişləri redaksiyasında çalışmaqla bərabər, Azərbaycan Dövlət Radiosu ilə əməkdaşlıq edib. Daha sonra «Azərbaycan gəncləri», «Kommunist» (indiki «Xalq qəzeti») qəzetlərində işləyib. «Səhər» qəzetinin yaradıcılarından biri kimi, baş redaktorun müavini, «Belə-belə işlər», «Kriminal» qəzetlərinin baş redaktoru olub. Dövri mətbuatda oçerkləri, müsahibə və reportajları, hekayə və povestləri ilə çıxış edib. «Belə-belə işlər» rubrikası ilə dərc etdirdiyi saysız-hesabsız yazıları ilə populyarlaşan Hidayət Elvüsal eyni zamanda mahnı mətnlərinin müəllifi və həvəskar bəstəkar kimi də tanınır.
