İranın Azərbaycana səfirinin seçilməsi prosesi son mərhələdədir. Bu barədə İran Xarici İşlər Nazirliyinin sözçüsü İsmayıl Bəqayi bildirib. İran XİN rəsmisi qeyd edib ki, Azərbaycan Respublikası ilə münasibətlərin normallaşması prosesini nəzərə alaraq, lazımi addımlar atılıb və səfirin seçilməsi prosesi son mərhələdədir.
Siyasi şərhçi Kazım Kazımov Sherg.az-a söyləyib ki, İran və Azərbaycan arasında son illərdə münasibətlər gərginləşib:
“Bunun əsas səbəbi Tehrandakı anti-Azərbaycan qüvvələrinin fəallaşılmasıdır. İran siyasətində təəssüflər olsun ki, yüksək mərtəbələrdə Azərbaycana qarşı pis münasibət bəsləyən qüvvələr var. Onların səsi yüksəldikcə Bakı və Tehran münasibətlərinə mənfi təsir göstərir. Ancaq son illərdə İranın regionda və bələxalq nizam daxilində rolunun azaldığını görürük. Xüsusilə Bəşər Əsədin devrilməsi, Yaxın Şərqdə İrana yaxın proksi qüvvələrin ağır zərbə alması Tehranı yenidən düşünməyə məcbur edib. İran anlamalıdır ki, region ölkələri ilə əlaqələr yaxşı olmadan güclü beynəlxalq siyasətçiyə çevrilmək olmaz. Regiona baxdığımızda isə İranın demək olar ki, bütün ölkələrlə fərqli-fərqli problemlərinin olduğunu görürük. Azərbaycanla münasibətlərə gəldikdə isə Tehran özü süni şəkildə bir problem yaratmağa çalışırdı. Zəngəzur dəhlizinə qarşı çıxdılar, Azərbaycanın suverenliyinə və xalqımızın milli kimliyinə söz atanlar oldu. Təbii ki, bunlar əsassız iddialar idi və nəticə etibarilə Tehrana xeyir gətirmədi. Son dövrlərə baxdıqda iki ölkə münasibətlərində müəyyən bir istiləşmə müşahidə olunur. İran prezidenti Məsud Pezeşkianın son səfəri də bunun nəticəsi idi. 2020-ci ildən sonra Prezident İlham Əliyev “3+3” formatını təkif etmişdi. “3+3” formatındakı ölkələrdən biri də İran idi. Lakin İran bunu vaxtına dəyərləndirə bilmədi və münasibətləri gərginləşdirmə yolunu seçdi. Ümid edirik ki, Tehran bundan sonra keçmiş səhvlərindən nəticə çıxarar və yeni səfir təyinatı qısa müddətdə başa çatar”.
