Son vaxtlar Azərbaycan və Ermənistan arasında sülh danışıqları daha da intensivləşib. Bu danışıqlar bölgədə uzunmüddətli sülh və sabitlik üçün vacibdir. Lakin bölgədə marağı olan böyük dövlətlər, xüsusilə Rusiya bu prosesə təsir göstərməyə çalışır.
Bu kontekstdə Rusiya xarici işlər naziri Sergey Lavrovun mayın 21-də Ermənistana edəcəyi rəsmi səfəri diqqət çəkib. Səfər zamanı sülh danışıqlarından da söhbət açılması da gözlənilən haldır. Ermənistan-Azərbaycan arasında sülhə zərər verə biləcək xarici müdaxilələrə isə yol verməməlidir. Ermənistanın müstəqil qərarlar qəbul etməsi və sülh prosesinə sadiq qalması bölgənin gələcəyi üçün önəmlidir. Azərbaycanın mövqeyi isə aydındır-məqsəd sabitlik, təhlükəsizlik və davamlı sülhdür.
Sherg.az-a açıqlama verən politoloq Tural İrfan Rusiyanın sülh danışıqlarına müdaxilə etməsində maraqlı olduğunu söyləyib:
"Azərbaycan və Ermənistan arasında sülh danışıqlarının effekt verdiyi bir dönəmdə Rusiyanın Ermənistanı özünə tərəf çəkmək cəhdləri müşahidə olunur. Nikol Paşinyanın Moskvaya səfəri və hazırda da Lavrovun İrəvana səfərinin nəzərdə tutulması bu münasibətlərin inkişafına hesablanıb. Təbii ki, Ermənistan uzun müddət Rusiyanın təsir dairəsindən kənar addım atmayıb, hazırki baş nazirin dövründə isə Qərbə meylli siyasət aparılıb. Rusiya Ermənistanda hakimiyyəti dəyişib eks prezidentləri hakimiyyətə qaytarmaq cəhdləri etsə də bu baş tutmadı. Müxtəlif aksiyalar, təzyiqlər edilsə də Paşinyanı uzaqlaşdırmaq mümkün olmadı. Bundan sonra Rusiya reallığı qəbullanaraq hazırki erməni hakimiyyəti ilə münasib davranmağa başladı. Təbii ki, regionda gedən proseslərlərdən Rusiya kənarda qalmaq istəmir və baş tutacaq sülh prosesinə yaxından müdaxilə etmək istəyir. Amma hansı formada müdaxilə etmək istədiyini hələ söyləmək tezdir. Təyyarəmizin vurulmasından sonra Rusiya ilə münasibətlərin bir qədər sərinləşməsini fürsət bilən Ermənistan da Rusiyaya meyl göstərdi. Həmçinin Rusiya-Ukrayna müharibəsində özünə üstün obraz yaratmağa niyyətlənən Rusiya Ermənistana Ukraynanı örnək göstərmək istəyir və Qərbin ona fayda verməyəcəyini ifadə edir".
Ekspert Ermənistanın Rusiyanın hansısa təxribatına uymasının nəticə etibarı ilə özünün ziyanına ola biləcəyini söyləyib:
"Elə addım atılmalıdır ki, ikitərəfli danışıqların mahiyyətinə xələl gəlməsin. Kənar müdaxilə işi poza bilər. İrəvan hakimiyyətinin heç zaman müstəqil siyasət apara bilməməsi həm Azərbaycanla münasibətlərdə həm də regionda sülh və stabilliyə əngəl olub. Azərbaycanın yürütdüyü dövlət siyasəti həm iki ölkə arasında həm də regionda sülhün davamlı olmasını nəzərdə tutur. Rusiyanın Ermənistanla münasibətləri, yenidən əlaqələrinin inkişaf etməsi sülhə, sabitliyə və Azərbaycanın maraqlarına zidd olmamalıdır. Ümid edirəm ki, Ermənistan hakimiyyəti də bunu nəzərə alaraq yaxınlaşmaqda olan sülh prosesinə kənar müdaxilə və təsirlərin mənfi nəticələrə gətirə biləcəyini hesablayacaq".
