İlan zəhərinin faydaları, dəyərinin də yüksək olduğu məlum idi, amma demə, əqrəb zəhəri toplamaq dünyada ən təhlükəli, həm də ən bahalı iş sayılırmış. “Sherg.az“Milliyet.com”a istinadən bildirir ki, Türkiyənin Şanlıurfa bölgəsində yaşayan Mətin Örənlərin qurduğu təsisatda milyon dollarlıq iş icra olunur. Qazancın mənbəyi isə zəhərli əqrəblərdir. Mətin Örənlər əqrəb yetişdirmək üçün 1 il əvvəl nəhayət icazə ala bilib. Və əqrəb yetişdiriciliyinə dair rəsmi icazə alıb. Bundan sonra yumurta qoya bilən əqrəbləri bölgədə toplamağa başlayıblar. İlkin olaraq 100 ədəd belə əqrəb toplayıblar. M.Örənlər 550 kvadrat metr ərazidə müəssisə qurub. Müəssisədə bütün dünyada hər növ əqrəb və ilan sancmalarına qarşı təsirli olan “Androctonus Crassicauda” cinsi əqrəblərin yetişdirilməsinə və zəhərlərinin əldə edilməsinə başlanılıb. Müəssisə 50 min əqrəb yetişdirmək gücünə malikdir, lakin hazırda 15 min əqrəbə sahibdirlər. M.Örənlər qeyd edib ki, əqrəb zəhəri ilan və əqrəb sancmalarına qarşı ən təsirli vasitədir və bugünədək Türkiyədə el arasında bu üsuldan geniş istifadə edilib. M.Örənlər əqrəblərdən əldə edilən zəhərin litrinin 10 milyon dollara satıldığını, əqrəb zəhərinin dünyada ən bahalı maddə olduğunu deyib. Müəssisə əsasən qara əqrəbləri toplayır və çoxaldır. Qara əqrəblər Şanlıurfa təbiətinə xasdır. Bu səbəbdən də onları toplayıb çoxaltmaq o qədər də çətin deyil. M.Örənlər əldə edilən qara əqrəb zəhərini dünya ölkələrinə ixrac etdiklərini də deyib.
Əqrəb zəhərinin qiyməti dodaq uçuqlatdı - Litri 10 milyon dollar!
