Polşada hamilə qadına aid ilk Misir mumiyası aşkar edildi. Araşdırma zamanı Varşava şəhərindəki Milli Muzey kolleksiyasında tapılan qədim mumiyanın hamilə bir qadına aid olduğu ortaya çıxdı.
“The First News” qəzetininin nəşrinə görə, əvvəlcə keşiş Hor-Djehutinin cəsədi olduğu düşünülən mumiyanın əslində bir qadına aid olduğu aşkarlandı.
“Sherg.az” “Ntv.com”a istinadən xəbər verir ki, mütəxəssislər bir neçə dəfə tomoqrafiya, rentgen və üçölçülü görüntüləmə ilə müayinə etdikləri qadının 26-28 həftəlik hamilə ikən mumiyalandığını müəyyənləşdirdilər.
Ölüm səbəbi müəyyənləşdirilməyən qadının 20-30 yaş aralığında olduğu qeyd edildi. Tədqiqatçılar hələ də qadının bətnindəki dölün cinsini müəyyənləşdirə bilməyiblər.
Polşa Elmlər Akademiyası Aralıq dənizi və Şərq Mədəniyyətləri İnstitutunun üzvü Voviç Ejmond araşdırma haqqında bu fikirləri söyləyib:
“Mumiyalanma zamanı döl mərhumun qarnından götürülməyib. Ona görə bu araşdırma kifayət qədər xüsusidir. Bu, o deməkdir ki, mumiyamız dünyada indiyə qədər bətnində döl olan yeganə mumiyadır”.
