Çay, qəhvə və ya bitki çaylarını “çox isti” içməyi üstün tutanlar üçün elmi xəbərdarlıqlar artır. Araşdırmalar göstərir ki, 65 dərəcədən yuxarı temperaturda içilən içkilər qida borusu xərçəngi riskini yüksəldir.
Sherg.az xəbər verir ki, Dünya Səhiyyə Təşkilatına bağlı Beynəlxalq Xərçəng Araşdırmaları Agentliyi 2016-cı ildə çox isti içkiləri “ehtimal ki, insanlarda kanserogen” kimi təsnif etmişdi.
Son illərdə Cənubi Amerika, Yaxın Şərq və Asiyadan sonra Avropada aparılan genişmiqyaslı araşdırmalar da bu əlaqəni təsdiqləyib. Böyük Britaniyada yarım milyon nəfər üzərində aparılan bir tədqiqatda gündə səkkiz fincandan artıq çox isti çay və ya qəhvə içənlərin, içməyənlərlə müqayisədə qida borusu xərçənginə tutulma riskinin altı dəfə daha yüksək olduğu müəyyənləşdirilib.
Mütəxəssislərə görə, problem içkinin növündən deyil, onun temperaturundan qaynaqlanır. Çox isti mayelər qida borusunun hüceyrələrini yandıraraq zamanla qalıcı zədələnməyə səbəb ola bilər. Bu vəziyyət mədə turşusunun da əlavə ziyan verməsinə yol açaraq xərçəngin inkişafını asanlaşdırır.
Risk yalnız temperaturla bağlı deyil, həm də içmə sürəti və qurtumun böyüklüyü ilə bağlıdır. 65 dərəcəlik qəhvədən alınan böyük bir qurtum qida borusunun daxili temperaturunu 10 dərəcəyə qədər artıra bilər. Bu təkrarlananda isə xroniki istilik zədəsi yarana bilir.
Araşdırmalara görə, qəhvə və çay üçün ideal içmə temperaturu təxminən 58 dərəcədir. Mütəxəssislər bildirirlər ki, içkiləri beş dəqiqə gözlətmək temperaturu 10–15 dərəcə azaldır. Qarışdırmaq, üfürmək, qapağı açmaq və ya bir az soyuq su və ya süd əlavə etmək də içkini daha təhlükəsiz hala gətirir.
