Mandarinin vətəni Çindir. Çində yüksək rütbəli məmurlara "mandarin" deyilirdi. Meyvə o zamanlar bahalı idi və onu yalnız məmurlar, yəni mandarinlər yeyə bilirdi. O vaxtdan meyvəyə də "mandarin" adı verilib.
İndi zamanda da mandarin ən sevilən və faydalı meyvələrdən biridir. Hətta mandarinin qoxusu insan sağlamlığına və əhvalına müsbət təsir edir - əhvalı yaxşılaşdırır, stressi və sinir gərginliyini azaldır, sakitləşdirir.
“Sherg.az” türk mediasına istinadən mandarinin faydalarını diqqətə çatdırır:
Mandarin xüsusilə C vitamini ilə zəngindir. Həmçinin onun tərkibində B1 və B2, P, K, D vitaminləri, A provitamini, efir yağları, pektinlər, orqanik turşular, fitonsidlər, qlikozidlər, kalsium, maqnezium, kalium və s. faydalı maddələr var.
C vitamini ilə zəngin olduğundan mandarin immun sistemini və damarları möhkəmləndirir, qocalma proseslərini ləngidir, orqanizmi cavanlaşdırır.
Mandarin ürək-damar sistemi üçün çox faydalıdır - aterosklerozun inkişafını ləngidir, damarların sağlamlığını və elastikliyini qoruyur, ürəyi möhkəmləndirir.
Mandarinin ağ qabığında spesifik "qlikozid" maddələri var ki, bu maddələr damar və kapilyarların sağlamlığı üçün çox faydalıdır. Məhz bu səbəbdən mütəxəssislər mandarini ağ qabıqları ilə birlikdə yeməyi tövsiyə edirlər.
Mandarinin tərkibində olan bəzi aminturşuları bronxları selikdən təmizləməyə kömək edir. Məhz bu xüsusiyyətə görə mandarin və xüsusilə də onun şirəsi bronxit və astma xəstələri üçün əsl təbii dərmandır.
Mandarin qurd, göbələk və mikrob əleyhinə xüsusiyyətlərə malikdir, orqanizmi toksinlər və şlaklardan təmizləyir, ümumi möhkəmləndirici təsir edir, orqanizmin tonusunu qaldırır.
Mandarin təbii antidepressantdır. Mütəxəssislər streslə mübarizə etmək üçün mandarin efir yağını qoxulamağı tövsiyə edirlər. Daha sadə üsul - mandarinin qabıqlarını əlinizdə əzin və qoxulayın.
Mandarinin tərkibində olan fitonsidlər soyuqdəymə və qrip xəstəlikləri ilə mübarizə aparmağa kömək edir.
Lakin onu da nəzərinizə çatdıraq ki, mandarin müəyyən qrup insanlar üçün ziyanlı ola bilər. Bütün sitrus meyvələri kimi, mandarin da güclü allergik xüsusiyyətlərə malikdir. Bundan əlavə kolit, qastrit, mədə və 12-barmaq xorası xəstəliyi, xolesistit, bəzi böyrək xəstəllikləri olan insanlar bu meyvədən sui-istifadə etməməlidir.
Mandarin yağı kosmetologiyada geniş istifadə olunur. Bu yağ dərini daha yumşaq və elastik edir. Apteklərdə satılan mandarin yağını müxtəlif qidalandırıcı maskalara əlavə etmək olar.
