Mütəxəssislər bildirirlər ki, smartfon və digər rəqəmsal cihazlardan uzun müddət istifadə təkcə psixoloji deyil, həm də fiziki sağlamlığa mənfi təsir göstərə bilər.
Sherg.az xəbər verir ki, BBC-nin hazırladığı araşdırmaya əsasən, cihazlardan həddindən artıq istifadə boyun quruluşunun dəyişməsi, görmə qabiliyyətinin zəifləməsi, əzələ gücünün azalması və incə motor bacarıqlarının pisləşməsi ilə əlaqələndirilir.
Araşdırmada qeyd olunur ki, telefon ekranına baxarkən başın davamlı şəkildə önə əyilməsi boyuna 27 kiloqrama qədər əlavə yük yaradır. Bu vəziyyət zamanla onurğa disklərinin zədələnməsinə, əzələ və oynaqlarda problemlərə, hətta ağciyər tutumunun azalmasına səbəb ola bilər. Bu hal "texnologiya boynu" adlandırılır.
Mütəxəssislər telefonun göz səviyyəsində tutulmasını, ekran qarşısında mütəmadi fasilələr verilməsini və açıq havada daha çox vaxt keçirilməsini tövsiyə edirlər. Onların sözlərinə görə, xüsusilə uşaqlarda açıq havada olmaq yaxındangörmənin (miyopiyanın) inkişaf riskini azalda bilər.
Araşdırmada həmçinin vurğulanır ki, texnologiyadan həddindən artıq istifadə əlin sıxma gücünü və motor bacarıqlarını zəiflədə bilər. Mütəxəssislər bu riskləri azaltmaq üçün fiziki aktivliyi artırmağı, əl bacarığı tələb edən fəaliyyətlərlə - yazı yazmaq, musiqi alətində ifa etmək, yemək hazırlamaq və ya əl işləri ilə məşğul olmağı tövsiyə edirlər.
