“Hazırki mürəkkəb beynəlxalq münasibətlər şəraitində Rusiya-Azərbaycan münasibətləri hər iki ölkənin maraqları kontekstində mühüm əhəmiyyət kəsb edir”. Bunu Sherg.az-a açıqlamasında millət vəkili, siyasi elmlər doktoru Hikmət Babaoğlu deyib.
Deputat bildirib ki, Azərbaycan Prezidenti cənab İlham Əliyevin Rusiyaya baş tutan işguzar səfəri və Vladimir Putinlə keçirdiyi görüşlərdə müzakirə olunan məsələlər bir daha ondan xəbər verir ki, bu münasibətlərin strateji müttəfiqlik səviyyəsində olması iki ölkənin maraqlarına tamamilə uyğundur:
“Təsadüfi deyil ki, Azərbaycan Prezidenti iki ölkə arasında münasibətlərdən danışarkən bildirdi ki, prezidentlər arasında keçirilən belə görüşlər ölkələr arasında strateji tərəfdaşlıq münasibətlərinin inkişafına təkan verir. Azərbaycan üçün Rusiya ən mühüm tərəfdaş, dost və mehriban qonşudur. Münasibətlərin belə yüksək səviyyəsi hazırda mövcud olan mürəkkəb geostrateji çağırışlar kontekstində iki dost və qonşu ölkənin təhlükəsizlik maraqları baxımından da aktualdır. Ona görə də tərəflər arasında “yol xəritəsi”nin reallaşdırılması bu münasibətlərə yeni stimul verir. Prezident İlham Əliyev “Valday” Klubunun fəaliyyətini də yüksək qiymətləndirərək onu dünyanın ən mühüm məsələlərinin müzakirə olunduğu platforma kimi qiymətləndirdi. Həqiqətən də qlobal çağırışlar kontekstində bu klubun fəaliyyəti dünya siyasətinə yeni rakursdan baxmağa imkan yaradan bəlkə də yeganə intellektual platformadır. Ona görə də, Prezidentin səfərini Rusiya-Azərbaycan arasında strateji müttəfiqlik səviyyəsində qiymətləndirilən ikili münasibətlərin gələcək perespektivləri baxımından olduqca önəmlidir”.
![](https://sherg.az/uploads/editor/e28328ff6b9c4a690d4e52ff9c7586de.jpg)
Millət vəkili qeyd edib ki, Prezident İlham Əliyev iclasdakı çıxışında ilk növbədə Ermənistanın baş naziri Nikol Paşinyana və onun sərsəm bəyanatlarına qətiyyətli və tutarlı cavab verib:
"Qarabağ Azərbaycandır və nida" sözləri işğalçı ölkənin başı üstündə ildırım kimi çaxdı. Nəzərə almaq lazımdır ki, işğalçı ölkəyə məhz Rusiya Federasiyasından, "Valday” Diskussiya Klubu kimi nüfuzlu platformanın tribunasından cavab verilməsinin özü olduqca ciddi bir ismarıcdır. Prezident İlham Əliyev "Qarabağ xalqı” kimi təxribatçı ifadələrə də cavab verərək qeyd etdi ki, bu, kökündən yanlış ifadədir, yalnız Qarabağ əhalisi var və bu, azərbaycanlı ilə erməni icmasından ibarətdir. Münaqişə başlayanda bu nisbət 75-in 25-ə azərbaycanlıların lehinə olub. Prezident bir daha bəyan etdi ki, problem BMT Təhlükəsizlik Şurasının məlum qətnamələri, Helsinki yekun aktının prinsipləri və Azərbaycanın ərazi bütövlüyü çərçivəsində həll olunmalıdır. Prezident İlham Əliyev bu bəyanatla bir daha Azərbaycanın qəti mövqeyini dünya ictimaiyyətinə çatdırdı".