Rusiya bütün xarici və daxili təzyiqlərdən istifadə edərək Ukraynada hakimiyyət dəyişikliyi etməyə çalışacaq
Rusiyanın XİN başçısı Sergey Lavrov Ukrayna Prezidenti Vladimir Zelenskini Moskvaya səfərə dəvət edib. Bu barədə Rusiya XİN-in rəhbəri radiostansiyalara müsahibəsində bildirib ki, əgər Ukrayna lideri RF ilə ikitərəfli münasibətlərin normallaşmasını müzakirə etmək istəyirsə, biz hazırıq:
"Qoy, Moskvaya, yaxud Soçiyə, Peterburqa gəlsin. Əgər Zelenski Donbassı müzakirə etmək istəyirsə, onda “Normand formatı”nın qərarı ilə Kiyev və Donetsk, Kiyev və Luqansk arasında bütün məsələlərin nizamlanmasına baxmalı olan təmas qrupuna üz tutsunlar".
S.Lavrovun açıqlamasını "Şərq"ə şərh edən politoloq Turab Rzayev bildirib ki, görüşün tezliklə baş tutacağı gözlənilən deyil:
"Əvvəl-axır Rusiya hansısa bir diplomatik yolla məsələni həll edəcək. Çünki Rusiyanın açıq şəkildə aqressiya göstərəcəyinə, birbaşa Avropanın içərisinə 100 minlik ordu və yüzlərlə texnika ilə daxil olacağını düşünmürəm. Bu, Rusiya üçün fəlakət olar. İqtisadi sanksiyaların altından qalxa bilməz. Sənayesinə, iqtisadiyyatına qoyulan sanksiyalar rəsmi Moskvanı çökdürər. Ona görə də Rusiya geri addım atacaq. Hətta ola bilsin, Ukrayna prezidentini indi qəbul etməsin".
T.Rzayevin qənaətincə, V.Zelenski dəvətdən imtina etsə də, hazırkı dönəmdə müharibə olmayacaq:
"Rusiya bütün xarici və daxili təzyiqlərdən istifadə edərək Ukraynada hakimiyyət dəyişikliyi etməyə çalışacaq. Bunun artıq ilkin elementləri də görünür. İndiki halda Moskvaya çağırılıb, Zelenskiyə "qulaqburması" verilə bilər. Rusiya ona ciddi bir təzyiq yaradıb. Bundan sonra da ondan hərbi gözləntilər istənilməsi ehtimalı var. Görüş baş tutsa belə, Rusiyanın yenə də rəsmi Kiyev daxilində özünə yaxın qüvvələri hakimiyyətə gətirməyə çalışması mümkündür".
