Avropa Parlamentinin qəbul etdiyi son qətnamə də bu məqsədə xidmət edir
“Çox təəssüf ki, hələ də anlamayıblar ki, bu cür cəhdlərin heç bir nəticəsi yoxdur və olmayacaq"
“Avropa Parlamentinin oktyabrın 24-də qəbul etdiyi “Azərbaycanda vəziyyət, insan hüquqlarının və beynəlxalq hüququn pozulması və Ermənistanla münasibətlər” adlı qətnaməsi Azərbaycana qarşı növbəti haqsızlıqdır. Avropa Parlamentinin bu siyasəti təkcə Azərbaycanla kifayətlənmir. Avropa Parlamenti xüsusilə İslam və türk dövlətlərini bu tip qətnamələrlə hədəf alır. Amma soyqırıma və işğalçılıq siyasətinə məruz qalmış, bir milyondan çox qaçqın və məcburi köçkün problemi ilə üzləşmiş Azərbaycana 30 ildə heç bir ciddi maliyyə yardımı ayrılmayıb. Ölkəmizin haqq səsinə BMT xaric heç bir beynəlxalq təşkilat, eləcə də Avropa Parlamenti səs verməyib. Təcavüzkar Ermənistana isə həm dünən, həm də bu gün ciddi maliyyə və hərbi yardımlar göstərilir, onunla siyasi-mənəvi həmrəylik nümayiş olunur. Bu faktın özü Avropa Parlamentinin, Qərb dövlətlərinin ikili standartlarından, ədalətsiz yanaşmasından xəbər verir. Avropa Parlamentində Gürcüstanla bağlı da 3 oxşar qətnamə qəbul edilib. Zaman-zaman Avropa Parlamentinin qardaş Türkiyə ilə bağlı da qərəzli münasibətinə şahid olmuşuq. Bu, hər şeydən öncə Qərbin qlobal siyasətdə qərəzli, ədalətsiz münasibətindən xəbər verir. Buna bir çox nümunələr göstərə bilərik.
Avropa Parlamentinin Azərbaycanla bağlı məlum qətnaməsi göstərir ki, Qərbdə ölkəmizin uğurlarını həzm edə bilməyən kifayət qədər qüvvə var və onlar bu yolla ölkəmizə süni maneələr yaratmağa çalışırlar. Bu baxımdan, Avropa Parlamentinin sözügedən qətnaməsinin qərəz və hikkədən irəli gəldiyi birmənalıdır. Lakin Avropa Parlamenti bilməlidir ki, 30 il ərzində Ermənistan və onun havadarlarının işğal siyasəti ilə barışmayan, sonda öz sözünü qətiyyətlə deyən, ərazi bütövlüyünü, suverenliyini bərpa edən Azərbaycanı bu cür əsassız, pafoslu qətnamələrlə qorxutmaq, onu geri çəkilməyə vadar etmək mümkün deyil. Heç bir sanksiya Azərbaycanı öz mili maraqlarını qorumaqdan, öz ərazi bütövlüyünün, suverenliyinin keşiyində dayanmaqdan geri addım atmağa vadar edə bilməz. Heç bir təhdid dövlətimizi öz haqlı mübarizəsindən döndərə bilməyəcək.
Qərbi Azərbaycan İcması da AP-nin qərəzli qətnaməsi ilə bağlı bəyanat yayıb. İcmanın bəyanatında vurğulanıb ki, beynəlxalq konvensiyalar iştirakçı dövlətlərin üzərinə Azərbaycan xalqına qarşı törədilən sistematik hüquq pozuntuları ilə bağlı konkret öhdəlik qoysa da, onların bir çoxu, ələlxüsus qərb ölkələri, bu məsələyə biganə yanaşıblar. Onlar nəinki bu hüquq pozuntularına göz yummuş, hətta Ermənistanı işğal və etnik təmizləmə kimi bədnam əməllərini davam etdirməyə cəsarətləndirmiş və regionda sülhün bərqərar olmasına həmişə əngəl törədiblər: "Azərbaycanın öz ərazi bütövlüyünü və suverenliyini bərpa etməsi ilə regionda dayanıqlı sülh üçün perspektivlərin ortaya çıxmasından narahat olan sözügedən qüvvələr öz pozucu əməllərini daha da fəallaşdırıblar. Daha çox parlament xətti ilə həyata keçirilən bu bədnam fəaliyyətlərdə ABŞ Konqresi, Avropa Parlamenti, Fransa, Niderland və digər dövlətlərin parlamentləri xüsusilə canfəşanlıq edirlər. Onilliklər ərzində azərbaycanlıların Ermənistan ərazisindən və vaxtilə işğal edilmiş Azərbaycan ərazilərindən etnik təmizləməyə məruz qalmasına, onların qayıdışına imkan verilməməsinə, mədəni irsinin sistematik şəkildə dağıdılmasına dəstək verən həmin ikiüzlü qüvvələr bütün bu əməllərin qurbanı olmuş Azərbaycana qarşı olmazın ittihamlar irəli sürürlər. Avropa Parlamentinin qəbul etdiyi növbəti bədnam qətnamə bu qəbildəndir. Avropa Parlamenti bu qətnamə ilə məlum dairələrin Azərbaycana qarşı COP29 ərəfəsində intensivləşən qarayaxma kampaniyasına öz “töhfəsini” vermiş olur. Azərbaycan və Ermənistan liderlərinin Kazanda görüşdüyü gündə Avropa Parlamenti tərəfindən belə bir sənədin qəbul edilməsi gülüncdür. Qərbi Azərbaycan İcması olaraq, Avropa Parlamentinin və qeyrilərinin Azərbaycan xalqına qarşı etnik və dini əsasda ayrı-seçkilik aparan, bölgədə yenidən münaqişəni yaratmağa xidmət edən cəhdlərini və bu mənfur əməllərinə “insan hüquqlarının müdafiəsi” donu geyindirmək cəhdlərini sərt şəkildə qınayırıq".
Politoloq Abutalıb Səmədov "Sherg.az"a açıqlamasında deyib ki, Avropa Parlamentinin və ona bənzər qurumların Azərbaycan əleyhinə qərarlar qəbul etməsi bir neçə mühüm səbəblə bağlıdır. Ekspertin sözlərinə görə, Azərbaycanın bütün ərazilərində suverenliyimizin təmin olunmasına qarşı Qərb əlindən gələni etdi:
"ABŞ Dövlət Departamenti rəsmisi Senatdakı müzakirələrdə qəti şəkildə bəyan etdi ki, ABŞ Azərbaycanın Qarabağ ermənilərinə qarşı zor tətbiq etməsinə imkan verməyəcək. Yəni əvvəlcədən məlum idi ki, antiterror tədbirləri hazırlanır və təqribən bir həftə əvvəl bu cür bəyanat verdi. Bəyanatdan təqribən üç gün sonra Türkiyədə görüş keçirildi. ABŞ-nin, Avropa Birliyinin, Rusiyanın iştirakı ilə antiterror tədbirlərinin qarşısını almağa son cəhd göstərildi. Sentyabrın 19-20 aralığında keçirilən antiterror əməliyyatı nəticəsində Azərbaycanın suverenliyi təmin olundu. Bu, son yüz ilin ən mühüm hadisəsi idi. Ardınca ermənilər könüllü şəkildə, heç bir təzyiqə məruz qalmadan Azərbaycanı tərk etdilər. Nəticədə erməni separatizminə son qoyuldu. Qərb təbii ki, bunu qəbul etmir, erməniləri nəyin bahasına olursa-olsun, geri qaytarmağa çalışırlar. Azərbaycanı "etnik təmizləmə"də bəzən hətta "soyqırımda" günahlandırırlar".
A.Səmədov vurğulayıb ki, belə cəhdlər bundan sonra da davam edəcək:
"Ermənilərin Qarabağda qalması Azərbaycana təzyiq üçün əlavə imkanlar yaradır. Qərb də bu imkanları əlində saxlamağa çalışır. Xatırladım ki, məhz həmin proseslər yaşanarkən COP29-un Azərbaycanda keçirilməsi ilə bağlı qərar qəbul olundu. Qərb dairələri Azərbaycanı təcrid etmək istəyirdilər, sanksiyaların tətbiqinə can atırdılar və bu məqamda yekdilliklə COP29-un Bakıda keçirilməsi barədə qərar qəbul olundu. Bu, Azərbaycanın çox böyük uğurudur. Digər yandan Azərbaycanın müstəqil siyasəti çoxlarını qane etmir. Avropa Parlamentinin qəbul etdiyi son qətnamə də bu məqsədə xidmət edir. Çox təəssüf ki, hələ də anlamayıblar ki, bu cür cəhdlərin heç bir nəticəsi yoxdur və olmayacaq".
