“Panikaya əsaslanan fəallıq Brüsselin (Avropa İttifaqı) bu günkü xarici siyasətinin təəssüf doğuran bir nümunəsidir”.
Teleqraf xəbər verir ki, bunu Gürcüstan parlamentinin sədri Şalva Papuaşvili deyib.
“Avropa Komissiyasının bu mətbuat katibi (Anita Hipper) tərəfindən dəstəklənən və ruhlandırılan insanlar oktyabrın 4-də cinayətə əl atdılar. O gün ölkəmizin qanlı xaos və 90-cı illərə qayıtmasına az qalmışdı.
Hazırda 62 nəfər həbsdədir, onları cəza gözləyir. Mətbuat katibi isə artıq iki həftədir 4 oktyabr hadisələrindəki məsuliyyətini sıradan çıxmış təbliğat ifadələrinin arxasında gizlədir. Panikaya əsaslanan fəallıq Brüsselin bugünkü xarici siyasətinin təəssüf doğuran bir nümunəsidir”, - Şalva Papuaşvili qeyd edib.
Avropa Komissiyasının mətbuat katibi Anita Hipper bundan əvvəl bildirib ki, hakim “Gürcü Arzusu” Partiyası Rusiya təbliğat maşını tərəfindən ruhlandırılan repressiv tədbirlər həyata keçirir.
Oktyabrın 4-də Gürcüstanda yerli hakimiyyət orqanlarına seçkilər keçirilib. “Gürcü Arzusu” seçkilərdən sonra qalib gəldiyini açıqlayıb. Brüssel və digər müvafiq Avropa qurumları seçkilərin nəticələrinə etiraz edib.
