Azərbaycan Afrika ölkələri ilə, o cümlədən Qvineya-Bisau ilə əlaqələrini gücləndirir. Qoşulmama Hərəkatına sədrliyi çərçivəsində bu münasibətlər yeni səviyyəyə yüksəlib. Son illərdə Misir, Əlcəzair, Konqo, Somali və Qvineya-Bisau ilə yüksək səviyyəli səfərlər və görüşlər keçirilib. İqtisadiyyat, enerji, müdafiə, təhsil və humanitar yardım sahələrində əməkdaşlıq genişlənir. “ASAN xidmət” modeli Afrika ölkələrində tətbiq olunur. Qvineya-Bisau Prezidenti Bakıya səfəri zamanı əməkdaşlığın daha da gücləndirilməsi müzakirə ediləcək.
Politoloq İlqar Vəlizadə “Sherg.az”a söyləyib ki, Afrika ölkələri Qoşulmama Hərəkatının böyük bir hissəsini təşkil edir:
“Azərbaycan sözügedən təşkilata rəhbərliyi dövründə bir çox Akrika ölkələriylə sıx dialoqlar qurmuşdu. Həmin dialoqlar sayəsində Azərbaycan və Afrika münasibətləri xüsusi dinamikaya yüksəlib. Hazırda da biz onun müəyyən dərəcədə bəhrəsini görürük. Azərbaycan həmin vaxtlar Afrika ölkələrinin mövqeylərini beynəlxalq arenada qorumağa çalışıb. Birləşmiş Millətlər Təşkilatı çərçivəsində Azərbayacan tərəfindən qaldırılan məsələlər Afrika ölkələrinin maraqlarına cavab verirdi. Son vaxtlar Fransanın köhnə müstəmləkələrinin haqlı tələblərinə şərik olan Azərbaycan Afrika ölkələrinə siyasi dəstək göstərib və beynəlxalq səviyyədə platformalar təqdim edib. Ona görə də apardığı siyasət nəticəsində Afrika ölkələrinin rəğbətini qazanıb. Qvineya-Bisau Respublikasının Prezidenti Umaro Moktar Sissoko Embalonun Azərbaycana bugünkü səfəri böyük əhəmiyyət daşıyır. Qvineya-Bisau Qərbi Afrikanın yoxsul ölkələrindən biridir və vaxtilə Fransanın müstəmləkə siyasətinin qurbanına çevrilib. Azərbaycan bir çox sahələrdə, xüsusilə də “ASAN xidmət”lə bağlı müsbət təcrübələrini müxtəlif Afrika ölkələrinə yaymağa çalışır. Görünən odur ki, Azərbaycanın təcrübəsi BMT tərəfindən yüksək qiymət alıb və bəzi ölkələr tərəfindən rəğbətlə icra edilir. Qvineya-Bisau da həmin təcrübələrdən yararlana bilər. Bəzi Afrika ölkələri zəngin təbii sərvətlərə malikdir, lakin uzun illər onları istismar edən ölkələr onların maraqlarını nəzərə almırdı. İndiki şəraitdə Azərbaycanın Afrika ölkələriylə müştərək münasibətlər qurması və zəngin yataqlara investisiyalar etməsi onun artan nüfuzundan xəbər verir”.
