Paşinyanın komandası vəziyyətə nəzarət edə bilmir
"Ermənistanda qərarvermə mexanizmi mürəkkəbdir, çünki Paşinyan və komandası vəziyyətə tam nəzarət edə bilmir, tək söz sahibi deyil".
Bu sözləri ReAL Partiyasının sədr müavini Natiq Cəfərli deyib. Partiya rəsmisi qeyd edib ki, Ermənistanda maraq qrupları çoxdur, hələ birini də Kreml "Vardanyan" adı ilə təzə oyuna salıb: "Ermənistan müharibə aparmaq iqtidarında deyil, amma bəlli maraq qrupları, əsas da Moskvadan qidalananlar anlayırlar ki, sülh sazişi indi imzalansa, həm Kremlin təsir rıçaqları azalacaq, həm də onların "revanş" hekayəsi bitəcək.
Ona görə də məqsəd böyük sülh sazişinin qarşısını almaq, zaman qazanmaqdır və Moskvanın təsirlərini saxlamaqdır. Paşinyanın da öz maraqları var. Moskvanın ona güvənmədiyini bilir, amma orbitindən də çıxa bilmir. Hər hadisədə KTMT-yə müraciət edir. Onlar da qarışmır, qarışa bilmir. Paşinyan da öz cəmiyyətinə mesaj verir ki, "bu ölüvay qurumdan da, Moskvadan da uzaqlaşmaq işində dəstək olsunlar". Ermənistanda anti-rusiya mövqeyi çox güclüdür və getdikcə güclənir".
N.Cəfərli bildirib ki, Azərbaycan sülh istəyir: "Biz səmimiyik, sülh və yolların tam açılması, iqtisadi əlaqələrin yaranması bizim strateji hədəfimizdir. Azərbaycan hakimiyyəti və müxalifəti bu məsələdə yekcins mövqedədir. Ona görə də xarici oyunçuların daxili oyunbazlıq qurması mümkün olmur. Azərbaycan hökumətinin xarici siyasətdə qurduğu doğru və çoxşaxəli ittifaqlar onu deməyə əsas verir ki, rəhbərlik impulsiv davranmır. Başqa dövlətin ərazisi ilə bağlı dünyanı tam üstümüzə qaldıracaq, haqlı ikən haqsız duruma sala biləcək addımlar atmırıq. Amma sülhəməcburetmə əməliyyatları da davam edə bilər".
