“Paşinyanın istefasının tələb edilməsi şübhəsizdir”
“Amma hakimiyyətə küçədən gələn bu adam var gücü ilə taxtından yapışıb”
Ermənistanda daxili vəziyyət getdikcə gərginləşir. Ölkəni etirazlar dalğası bürüyüb. Baş nazir Nikol Paşinyanın həmin dalğanın altında qalaraq boğulması da tam realdır. Paşinyan qurduğu diktatura rejiminin demokratikliyinə dair imitasiya imkanlarını da artıq itirib.
“Lider” ölkəsini fəlakətə məhkum etmiş bir şəxs kimi onu ittiham edən bütün müxalifət nümayəndələrini həbsə atdırır, onlara təzyiqlər və təhdidlər edilir. Siyasi partiyalar da etirazlara başlayıb. Onlar israrla Paşinyanın istefasını tələb edirlər. Ermənistan Müdafiə Nazirliyinin sözçüsü Artsrun Hovhannisyanın istefa verməsi isə artıq son həddir. Bundan o tərəfi yoxdur.
BDU-nun müəllimi, beynəlxalq məsələlər üzrə ekspert Sultan Zahidov “Sherg.az”a rəsmi İrəvandakı vəziyyəti şərh edib:
“Birincisi, Ermənistanda çoxları məğlubiyyəti, torpaqların tarixi sahiblərinə qaytarılmasını qəbul edə bilmirlər. Amma yeganə səbəb bu deyil. Etirazçıların əksəriyyəti müxalif qüvvələr, o cümlədən “Daşnak sütun” partiyasıdır. Çünki reallığı dərk edənlər də var. Məsələ ondan ibarətdir ki, indiki vəziyyətdə hakimiyyətdə kim olur olsun, o, kapitulyasiya imzalamağa məcbur idi.
Əlbəttə, sənədin daha əvvəldən imzalanması Paşinyanın xeyrinə olardı. Ancaq məsələni uzatdı. Əgər baş nazir yenə də müqavimətə cəhd etsəydi, aqibəti indikindən də betər olardı. O, özü etiraf etmişdi ki, bu qərarı verməzdən əvvəl ordu rəhbərliyi ilə məsləhətləşib.
Görünür, Paşinyana reallığı başa salıblar. Baş nazirin istefasının tələb edilməsi şübhəsizdir. Amma hakimiyyətə küçədən gələn bu adam var gücü ilə taxtından yapışıb”.
