Lekornu sadəcə Makronun yaxın adamı idi
“Gedişat ölkəni siyasi sabitsizliyə aparır. Çıxış yolu yenidən seçkilərin keçirilməsi ola bilər"
Fransa Prezidenti Emmanuel Makron bazar günü ölkəni siyasi böhrandan çıxarmağa çalışan Baş nazir Sebastyan Lekornunun başçılıq etdiyi komandanı bir araya gətirərək yeni hökuməti formalaşdırıb. Bir çox əsas nazirlər öz postlarını qoruyublar. Lakin Baş nazir Sebastyan Lekornu hökumətin yeni tərkibinin elanından bir neçə saat sonra istefa verib. Makron Lekornunun istefasını qəbul edib.
Fransada həm sol, həm də sağ müxalifət yeni hökumətin tərkibini kəskin tənqid edib. Müxaliflər kabinetdə əksər nazirlərin vəzifədə qalmasını gözləntilərinin puça çıxması kimi qiymətləndirib. "Əyilməz Fransa" hərəkatının lideri Jan-Lyuk Melanşon yeni hökuməti "əziyyət siyasətini" davam etdirən "kölgələr karvanı" adlandırıb. Onun partiya yoldaşı Erik Kokrel hökumətə etimadsızlıq səsverməsi tələb edəcəyini açıqlayıb. "Milli Birlik" lideri Marin Le Pen yeni kabineti "acınacaqlı" adlandırıb. Partiya sədri Jordan Bardella isə "ya Makron siyasətindən qopmaq, ya da etimadsızlıq səsverməsi" çağırışı edib.
Fransadakı qarışıqlığı Sherg.az-a şərh edən politoloq Oqtay Qasımov deyib ki, Sebastyan Lekornu baş nazir postuna peşəkarlığına, yüksək siyasi nüfuzuna görə deyil, Prezident Makrona yaxın olduğu üçün təqdim olunmuşdu. Ekspert vurğulayıb ki, Lekornuya fransız cəmiyyətində də etimad yüksək deyildi:
"Çünki Lekornu daxili işlər naziri postunda ikən etirazçılara qarşı sərt davranışları ilə yadda qalıb. İstefasının səbəblərinə gəldikdə isə öncə deyim ki, Lekornu sadəcə 1 ay ərzində vəzifəsində qaldı və elə bu qısa dönəmdə ciddi tənqid olundu. Onun istefası siyasi və iqtisadi səbəblərlə bağlıdır. Siyasi səbəblər odur ki, Fransanın siyasi palitrası son illərdə kifayət qədər dağınıqdır. Burada siyasi qüvvələr parçalanmış vəziyyətdədir. Bunu ötən il Fransada keçirilən parlament seçkilərində gördük. Heç bir siyasi qüvvə parlamentdə təkbaşına hökumət yaratmaq və dayanıqlı kabinet qurmaq imkanlarına malik deyil. Lekornu da məhz buna görə istefa vermək məcburiyyətində qaldı. Onun təmsil etdiyi siyasi qüvvə parlamentdə mütləq, əzici üstünlüyə malik deyil. Ona görə də koalisiya hökuməti müxtəlif müttəfiqlərlə danışıqlar əsasında formalaşmışdı".
O.Qasımov əlavə edib ki, belə hökumət uzunmüddətli ola bilməzdi və elə hökumətdə təmsil olunan qüvvələr tərəfindən də tənqidə məruz qalırdı:
"Təzyiq altında olan bir koalisiya hökumətinin iqtisadi islahatlar aparması da qeyri-mümkün idi. Son illərdə Fransada gərgin siyasi durum məhz ölkə iqtisadiyyatını da zəiflədib, dövlət borcu artıb, iqtisadi inkişaf tempi aşağı düşüb. Ölkəni bu vəziyyətdən çıxarmaq üçün çevik və dayanıqlı hökumətə ehtiyac var. Lekornu indi istefa verməsəydi, təzyiqlərə dözsəydi belə, bunu uzun müddət sürdürə bilməzdi. O səbəbdən bəri başdan uzaqlaşmaq qərarına gəldi. Gedişat ölkəni siyasi sabitsizliyə aparır. Çıxış yolu yenidən seçkilərin keçirilməsi ola bilər".
