Paşinyan zamanla yarışır
Sülh sazişinin imzalanması məhz delimitasiya ilə bağlı həssas məqamlara görə ləngiyir
30 noyabrda Azərbaycanla Ermənistan arasında sərhədin demarkasiyası və sərhəd təhlükəsizliyi komissiyalarının sərhəddə keçirilən 5-ci iclası ilə bağlı bəzi yeni təfərrüat yayılıb. Erməni mediası görüşdə Ermənistan tərəfdən baş nazirin müavini Mger Qriqoryanla yanaşı, Kadastr Komitəsinin rəis müavini və MTN əməkdaşlarının da iştirak etdiyini bildirib. Qeyd edilib ki, görüş sərhəddə yerləşən çadırda baş tutub, hansısa binada deyil. Erməni mediası anklavlar məsələsinin də müzakirə edildiyini, onların qaytarılması istiqamətində razılıq olduğunu yazıb. Buna Nikol Paşinyanın “Ermənistanın 29 800 kilometr ərazisinə Sovet dövründə Azərbaycana məxsus olan anklavlar daxil deyil” fikirləri əsas kimi göstərilib. Həmçinin Ermənistan parlamentinin sədri Alen Simonyanın bir neçə gün öncəki açıqlamasına da yer verilib: “İrəvan Başkəndi almaq müqabilində sovet dövründə mövcud olan anklavları Bakıya qaytarmağa hazırdır”. Tavuş qubernatoru isə anklavlarla bağlı 30 noyabrda heç bir razılıq əldə edilmədiyini açıqlayıb: “Məndə olan məlumata görə, hələlik heç bir razılaşma yoxdur”.
Siyasi şərhçi Əlisahib Hüseynov "Sherg.az"a açıqlamasında deyib ki, yekun sülh sazişinin əldə edilməsi üçün delimitasiya işinin başa çatdırılması, hər iki ölkənin sərhəd təhlükəsizliyinə qarşılıqlı zəmanət verilməsi olduqca vacibdir. Ekspert bildirib ki, sülh sazişinin imzalanması da ilk növbədə məhz delimitasiya ilə bağlı həssas məqamlara görə ləngiyir:
"Nikol Paşinyan sərhədlərin delimitasiyasının başa çatdırılmasının və hələ də Ermənistanın işğalı altında olan anklavların (Azərbaycana məxsus 8 kəndin) geri qaytarılmasının erməni ictimaiyyəti və siyasi rəqibləri tərəfindən xəyanət kimi qiymətləndiriləcəyindən ehtiyat edir. Lakin bütün hallarda Ermənistan rəhbərliyi sözügedən siyasi-psixoloji maneəni aşmağa məhkumdur. İndi delimitasiyanın da, sülh anlaşmasının da taleyi məhz rəsmi İrəvanın siyasi iradəsindən asılıdır. Sələflərindən fərqli olaraq Paşinyan öz hakimiyyət maraqlarını deyil, xalqını düşünə və siyasi qətiyyətlilik göstərib sülhə imza ata bilər. Əks təqdirdə Ermənistanın siyasi və iqtisadi böhranlar məngənəsində vurnuxması bundan sonra da davam edəcək".
Analitikə görə, Qazax-İcevan sərhədində keçirilən görüşün nəticələrinə pozitiv yanaşmaq mümkündür:
"Müxtəlif bəhanələrlə özlərini prosesə pərçim etmək və vasitəçi statusunu qazanmaq istəyən ABŞ, Rusiya, Fransa, Aİ-nin iştirakı olmadan baş tutan beşinci görüşdə əvvəlki görüşlərdən fərqli olaraq bir sıra məsələlər üzrə ilkin razılaşmalar əldə edilib. Görünən budur ki, Ermənistan tərəfi ABŞ-ni və Qərbi əsassız iddialarla Azərbaycanın üzərinə siyasi-diplomatik hücumlara təhrik etməklə rəsmi Bakıya təzyiq göstərməyin və sülh müqaviləsinin imzalanmasını, sərhədlərin müəyyən edilməsini süni surətdə yubatmağın səmərəsizliyini anlayıb. ABŞ-nin Azərbaycana qarşı demarşının nəticəsizliyi də Ermənistanın hərbi-siyasi hakimiyyətini düşünməyə vadar edir. Paşinyan iqtidarı başa düşür ki, Ermənistanın bu cəhdləri əks effekt verir və ilk növbədə onun öz inkişafını ləngidir. Ona görə də görüş öncəsi müxtəlif ekspertlər tərəfindən irəli sürülən bütün bədbin öncəgörmələrə və təxminlərə rəğmən, noyabrın 30-da məlum sərhəd görüşü baş tutdu. Ümid edək ki, rəsmi İrəvan bundan sonra qeyri- konstruktiv yanaşmalardan əl çəkərək növbəti görüşlərin keçirilməsinə süni əngəllər törətməyəcək və delimitasiya məsələlərinin sürətləndirilməsinə səy göstərəcək".
