Ancaq Bakı və Moskva xəttində ortaq mövqelərin tapılması istisna deyil
"Moskvada XİN rəhbərləri səviyyəsində üçtərəfli görüşdən imtina edən İrəvan liderlərin də təmasından yayındı. Aydındır ki, bu, səbəbsiz-məqsədsiz deyil". Bu barədə "Şərq"ə açıqlamasında siyasi şərhçi Asif Nərimanlı deyib. Analitik bildirib ki, İrəvan “Laçın yolu”nun açılmasını bu qədər istəyirsə, XİN rəhbərlərinin də, liderlərin də görüşündə maraqlı olmalı idi: "İrəvan görüşlərdən imtina etməklə, "Rusiya Qarabağdakı erməniləri qoruya bilmir” fikrini gücləndirir və məsələdən Moskvaya qarşı istifadə edir. Avropada Bakıya qarşı beynəlxalq təzyiqin hazırlanması cəhdlərinə ümid edir.
Əgər Laçın yolundakı aksiya Rusiyanın yox, Qərbin Bakıya təzyiqi ilə dayandırılsa, bu, Moskvanın məğlubiyyəti olacaq. O da aydındır ki, üçtərəfli görüş keçirilsəydi, Laçın yolu ilə başlanan müzakirələrin sonu üçtərəfli razılaşmaların icrası tələbi ilə yekunlaşacaqdı və Paşinyan qaçmaqla prosesi uzadır. İkincisi, sülh müqaviləsinin müzakirəsidir. Bakı qəbul etməsə də, Paşinyan Fransanın vasitəçiliyinə, o cümlədən üçtərəfli razılaşmalardan yayınmaq və Qarabağdakı separatçıların “qəbul edilməsi” məsələsində Parisin dəstəyinə ümid edir.
Eyni zamanda BMT TŞ-də gözlənilən növbəti müzakirələrlə Bakının təkcə Laçın yolu məsələsində yox, sülh müqaviləsində də geriyə düşə biləcəyini “hesablayır”. Anlayır ki, Rusiya masasında sülh müqaviləsinin müzakirəsi üçtərəfli razılaşmaların icrası tələbinin kölgəsində keçəcək".
Ekspert qeyd edib ki, Bakı-Moskva xəttində ciddi fikir ayrılığı olsa da, üçtərəfli razılaşmaların praktiki icrası məsələsində ortaq mövqelərin tapılması istisna deyil:
"Xüsusilə Bakının davamlı gündəmdə saxladığı erməni silahlı dəstələrinin çıxarılması bəndi üzrə ortaq mövqeyə gəlinə bilər. Düz məntiq rusların sülh prosesində iştirakçılığının mövcud vəziyyətdə Bakının istədiklərini verməkdən keçdiyini deməyə əsas verir. Bakı böyük ehtimalla praktik addımların miqyasını beynəlxalq müstəvidə hazırlanan erməni təxribatının mümkün təsirlərinə uyğun müəyyən edəcək".
