Azərbaycan-Ermənistan sülh sazişi demək olar hazırdır, son məqamlar qalıb.
Bunu Azərbaycanın Baş naziri Əli Əsədov V Tbilisi İpək Yolu Forumunda deyib. Onun sözlərinə görə, hər iki tərəf bu istiqamətdə hazırlaşır.
“Vaxtı-zamanı gələndə sülh imzalanacaq”, – Əli Əsədov qeyd edib.
Xatırladaq ki, son aylarda Azərbaycan və Ermənistan arasında birbaşa təmaslar intensivləşib. Tərəflər müxtəlif beynəlxalq platformalarda görüşlər keçirir və danışıqları davam etdirirlər.
Qeyd edək ki, sülh sazişinin imzalanması Cənubi Qafqazda yeni təhlükəsizlik və əməkdaşlıq mərhələsinin başlanğıcı kimi qiymətləndirilir.
Politoloq Turan Rzayev Sherg.az-a bildirib ki, Vaşinqtonda paraflanan sənəd Azərbaycan və Ermənistan arasında sülh sazişinin hazır olduğunun göstəricilərindən biridir:
"Həmin görüşdən sonra iki ölkə arasında təmaslar birbaşa davam edir. Paralel olaraq Azərbaycan Prezidenti və Ermənistan Baş naziri müxtəlif platformalarda bir araya gəlir, ikitərəfli danışıqlar aparırlar. Maraqlıdır ki, bu danışıqlar vasitəçi və xarici müdaxilə olmadan, tamamilə təbii formatda keçirilir. Bu isə ölkələr arasındakı problemlərin 90 faizinin artıq həll olunduğunu göstərir. Azərbaycan, yəqin ki, Ermənistanda qarşıdan gələn seçkiləri gözləyir. Seçkilərdən sonra Baş nazir Nikol Paşinyan vəzifəsində qalarsa, Konstitusiyanı dəyişəcək. Konstitusiyadan Azərbaycana və qonşu ölkələrə qarşı ərazi iddialarını əks etdirən maddələr çıxarıldıqdan sonra 2026-cı ildən etibarən sülh sazişinin imzalanacağını söyləmək mümkündür. Yəni, 2026-cı ildə sülh sazişinin reallaşması gözlənilir".
