Ermənistan Silahlı Qüvvələri Azərbaycanla dövlət sərhədindəki üç rayonunda silahlı təxribat törədiblər. Ermənilər sentyabrın 11-i Gədəbəy rayonunun Novoivanovka və Laçın rayonunun Hüsülü yaşayış məntəqələri istiqamətlərində yerləşən mövqelərinə atıcı silahlardan atəş açıblar. Bundan başqa, Rusiya sülhməramlılarının müvəqqəti yerləşdiyi Azərbaycan ərazisində olan qeyri-qanuni silahlı dəstələrinin üzvləri isə Kəlbəcər rayonunun Ağqaya yaşayış məntəqəsini müxtəlif mövqelərini atəşə tutub.
Ermənilərin səngiməyən provokasiyaları barədə "Sherg.az"a danışan tanınmış jurnalist, siyasi şərhçi Fuad Abbasovun qənaətincə, təxribatlara "Qisas" əməliyyatının davamı kimi cavab vermək lazımdır:
"Erməni tərəfi sanki əks- hücum gözləyirmiş kimi addımlar atır. Azərbaycan "Qisas" əməliyyatını gerçəkləşdirib. Bundan sonra da həyata keçirəcək. Bilə-bilə təxribatlara əl atırlar. Azərbaycan tərəfindən hərbi əməliyyatların davamını istəyirlər və yaxud gözləyirlər. Ya Rusiya tərəfindən gələn sifariş, ya da erməni lobbisinin fəaliyyətlərinin nəticəsidir.
Rus mətbuatında tirajlanan xəbərlərdə Azərbaycan günahlandırılır. Rusiya ictimaiyyətinə dezinformasiya yayaraq ölkəmizi əvvəlcədən münaqişədə haqsız çıxarmaq üçün işlər görür.
Guya, erməni tərəfi sakit oturub. Dinc həyat istəməsinə baxmayaraq, Azərbaycan onları qıcıqlandırır. Durumu "Qisas" əməliyyatının bir daha təkrarlanması, ardınca yenidən təxribatlara keçilməsi kimi qiymətləndirirəm".
Qeyd edək ki bəzi erməni kütləvi informasiya vasitələrində Azərbaycan Ordusunun bölmələri tərəfindən Xocavənd rayonunun Qırmızı Bazar yaşayış məntəqəsi istiqamətində guya atəşin açılması və nəticədə mülki infrastruktura ziyan dəyməsi barədə məlumat yayılıb. Azərbaycan Müdafiə Nazirliyi ( MN ) ermənilərin iddiasını təkzib edib. Şayiələrin heç bir real əsası olmadığını və həqiqəti əks etdirmədiyini açıqlayıb.
