“Rusiya KİV-ləri həmin silahlı dəstələri göydən, havadan gələn “terrorçularla” səhv salıblar”
“Rusların gözünün önündə real terrorçu dəstələr var və onlar qanunsuz erməni silahlılarıdır”
Rusiyanın “Ria Novosti” Agentliyi Türkiyə əleyhinə növbəti dezinformasiyanı tirajlayıb. Azərbaycan və qardaş Türkiyə əleyhinə dəfələrlə feyk xəbərlər yayan rus nəşri iddia edib ki, guya Türkiyə 2020-ci ildə, yəni 44 günlük müharibədə Azərbaycana kömək üçün Suriyadan Qarabağda gətirdiyi 2 mindən çox suriyalı terrorçuları bölgədən çıxararaq Ukraynaya, ruslara qarşı savaşmağa göndərib. Guya həmin döyüşçülər Ukrayna hakimiyyətinin yaratdığı “xarici legiona” qoşulublar.
Xatırladaq ki, “Ria Novosti” və digər rus KİV-ləri Vətən müharibəsi dövründə də bənzər ittihamları gündəmə gətirmiş, ermənilərə qarşı “suriyalı terrorçuların” savaşdığını iddia etmişdi. Bu cür xəbərlərin uydurma olduğu hamıya bəllidir. Bunun əksinə, Ermənistan tərəfindən Azərbaycanın əraziləri işğal edilərkən hərbi əməliyyatlarda terror qruplaşmalarından və muzdlu döyüşçülərdən istifadə edildiyinə dair çoxsaylı faktlar mövcuddur. Livandan, o cümlədən İraq və Suriyadan Ermənistana, oradan da Qarabağa terrorçuların gətirilməsi ilə bağlı çoxsaylı faktlar nəinki Azərbaycan və Türkiyə, həmçinin əcnəbi ölkələrin mediasında da işıq üzü görüb.
Siyasi şərhçi, “Xalq Cəbhəsi” qəzetinin baş redaktoru Elçin Mirzəbəyli “Sherg.az”a açıqlamasında bildirib ki, Rusiyanın Ukraynanı işğal planında uğursuzluq və müdafiə nazirliyinin yol verdiyi ciddi səhvlər günahı kiminsə boynuna atmaq üçün zəmin yaradıb. Ekspert bildirib ki, müharibə dövründə Azərbaycan ərazisində Ermənistan silahlı birləşmələrinə qarşı hansısa terrorçunun, muzdlu əsgərin döyüşmədiyi hamıya bəllidir:
“Bu faktlar Rusiya tərəfinə daha yaxşı bəllidir. Çünki faktiki olaraq Qarabağda Rusiya-Türkiyə Monitorinq Mərkəzində birlikdə fəaliyyət göstərirlər. Moskva Qarabağda kənar hansı kontingentin yerləşdiyini gözəl bilir. O baxımdan belə uydurma, absurd informasiyaların tirajlanması “Ria Novosti”nin növbəti təxribatıdır. Təxribat olmaqla yanaşı, mahiyyət etibarı ilə utancverici yanaşma tərzidir. Türkiyə və Azərbaycan regionda, bütün postsovet məkanında sülhün, əmin-amanlığın bərpa olunmasına çalışır.
Rusiyanın Antalyada keçirilən görüş fonunda müsbət məqamlara köklənmək əvəzinə baş verən uğursuzluqların günahını Azərbaycanda, yaxud Türkiyədə axtarması gülüncdür.
Diqqətə çatdırım ki, 10 noyabrda imzalanmış üçtərəfli bəyanatın əsas prinsiplərindən biri hələ də yerinə yetirilməyib. Azərbaycan ərazilərində qanunsuz erməni silahlıları qalmaqdadır. Sirr deyil ki, torpaqlarımızdakı erməni silahlı birləşmələrini Rusiya sülhməramlılarının komandanı Volkov himayə edir.
Rusiya KİV-ləri Qarabağdakı erməni terrorçularını, göydən, havadan gələn “terrorçularla” səhv salıblar. Rusların gözünün önündə real terrorçu dəstələr var və onlar qanunsuz erməni silahlılarıdır”.
