“Sahibə xanımın qardaş ölkəyə getməsi ölkələrimiz arasındakı münasibətlərə tarixi töhfəsini verəcək”
Türkiyədə rəsmi səfərdə olan Milli Məclisin sədri Sahibə Qafarova Türkiyə Ticarət naziri Ruhsar Pekcanla görüşüb. Bu barədə Ruhsar Pekcan öz “Twitter” səhifəsində məlumat verib. Türkiyəli nazir qeyd edib ki, S.Qafarova ilə görüşdə iki dövlət arasında olan mövcud əməkdaşlığı gücləndirmək və qadınların, eləcə də, gənclərin təşəbbüslərini dəstəkləmək üçün atılan addımlar müzakirə edilib.
Səfəri “Sherg.az”a şərh edən millət vəkili Jalə Əliyeva iki qardaş dövlət arasındakı münasibətlərin həmişəki kimi, indi də ən yüksək səviyyədə olduğu qənaətindədir:
“Azərbaycan və Türkiyə arasındakı münasibətlər hər keçən gün daha da inkişaf edir. Heç kimə sirr deyil ki, bu iki dövlət bölgədə və dünyada öz qardaşlıqları, tərəfdaşlıqları ilə seçilir. Biz bütün sahələrdə əməkdaşlıq edirik.
Elə bir sahə yoxdur ki, orada əlaqələrimiz olmasın. Bu münasibətlər isə yeni deyil, əksinə, tarixi ənənədir. Ümumilli lider Heydər Əliyevlə türkiyəli həmkarı Süleyman Dəmirəl arasındakı dostluq və qardaşlıq münasibətlərini bu gün dövlət başçısı İlham Əliyev və Rəcəb Tayyib Ərdoğan davam etdirirlər”.
J.Əliyevanın fikrincə, S.Qafarovanın Türkiyəyə səfəri həm də simvolik xarakter daşıyır:
“Bizim parlamentlər arasındakı münasibət də nümunəvi səviyyədədir. Milli Məclis sədrinin ilk səfərinin məhz Türkiyəyə olması təsadüfi deyil.
Bəlkə də, səfər bir az gecikib.
Amma dünyada tüğyan edən koronavirus pandemiyası ilə əlaqədər yumşalmaların tətbiq olunduğu ilk anda bu səfər baş tutdu. Düşünürəm ki, sözügedən məqam dünyaya və bölgəyə əhəmiyyətli mesajdır.
Bu, indiyədək baş vermiş səfərlərin uğurlu davamıdır. Zənnimcə, Sahibə xanımın Türkiyəyə getməsi ölkələrimiz arasındakı münasibətlərə tarixi töhfəsini verəcək”.
