Liderlərin telefon dialoqu nümunəvi qonşuluq siqnalıdır
Oktyabrın 7-də Azərbaycan Prezidenti İlham Əliyev Rusiya rəhbəri Vladimir Putinə zəng edib. Dövlət başçısı rusiyalı həmkarını doğum günü münasibətilə təbrik edib. Vladimir Putin təbriklərə görə təşəkkürünü bildirib. Telefon danışığı zamanı Azərbaycan ilə Rusiya arasında əlaqələrin mövcud vəziyyətinə və perspektivlərinə dair fikir mübadiləsi aparılıb. Kremlin sözçüsü Dmitri Peskov Rusiya Prezidenti Vladimir Putinlə Azərbaycan Prezidenti İlham Əliyev arasında telefon danışığını vacib adlandırıb: "Həqiqətən telefon zəngi olub. Bu, vacibdir. Prezident Əliyev Prezident Putini ad günü münasibətilə təbrik edib. Hələlik bu günə bunu deyə bilərəm".
Azərbaycan liderinin məlum gərginlikdən sonra Kreml rəhbərinə zəng edərək belə bir jest göstərməsini Sherg.az-a dəyərləndirən Vətəndaş Həmrəyliyi Partiyasının Siyasi Şurasının üzvü Asif Şəkərli deyib ki, Azərbaycan və Rusiya liderləri arasında müəyyən əlamətdar günlərdə təbrik zəngləri ənənəvi xarakter daşıyır. Siyasi şərhçi vurğulayıb ki, lakin hazırkı geosiyasi vəziyyətdə - Bakı ilə Moskva arasında müşahidə olunan gərginlik fonunda, belə bir zəng heç şübhəsiz ki, xüsusi diqqət çəkir:
"Bu, sıradan ad günü təbriki kimi deyil, həm də iki dövlət arasında münasibətlərin yumşalmasına doğru bir addım sayıla bilər. Məlum təyyarə hadisəsindən sonra Rusiyanın yarıtmaz siyasəti səbəbindən münasibətlərdə gərginlik yarandı. Bu məsələdə nə normal şəkildə üzrxahlıq oldu, nə də kompensasiya ödənildi. Ardınca Rusiyada azərbaycanlılara qarşı zorakılıq halları baş verdi, bu, gərginliyi daha da artırdı. Ancaq Azərbaycan cəmiyyəti heç vaxt Rusiya ilə münasibətlərin gərginləşməsinin tərəfdarı olmayıb. Azərbaycanın Rusiya ilə əlaqələri tamamilə kəsməsi və ya münasibətləri artan gərginlik üzərində yürütməsi maraqlarımıza uyğun deyil. Bu mənada Azərbaycan Prezidenti İlham Əliyevin Putinə zəngi nə güzəştin, nə də yumşalmanın göstəricisi sayılmalıdır. Bu, Azərbaycanın öz regional dövlət maraqlarına uyğun olaraq qarşı tərəfi bir daha təmkinli və mehriban qonşuluq münasibətlərinə dəvət etmək təzahürüdür. İndi gözlənilən Kremlin buna adekvat cavabıdır".
