“Yarımsəhra iqlimə malik ərazi səhralaşmağa doğru gedir. Şəhərdə havanın yüngülləşməsi üçün heç bir tədbir görülmür, vəziyyət getdikcə pisləşir”
Ölkə ərazisində gözlənilən küləkli hava şəraiti ilə bağlı sarı xəbərdarlıq verilib. Milli Hidrometeorologiya Xidmətinin məlumatına görə, iyulun 11-də küləyin sürətinin yüksələcəyi gözlənilir. Bildirilib ki, sarı xəbərdarlığa uyğun olaraq Bakıda və Abşeron yarımadasında, Culfa, Ordubad, Şəki, Gəncə, Şəmkir, Samux, Ağdam, Naftalan, Goranboy, Mingəçevir, Tərtər, Bərdə, Yevlax, Salyan, Biləsuvar, Neftçala, Cəlilabadda şimal-qərb küləyi əsəcək və küləyin sürəti 13.9-20.7 m/san təşkil edəcək.
“Sarı xəbərdarlıq”, “qırmızı xəbərdarlıq”, “sarı”, “qırmızı həyəcan” terminləri son zamanlar tez-tez işlənir. Havanın temperaturunun artması, sel, daşqınlarla bağlı bu cür xəbərdarlıqlar edilir. Bu terminlər hansı təhlükədən xəbər verir?
Ekoloq Ənvər Əliyev “Sherg.az"a açıqlamasında qeyd etdi ki, “sarı xəbərdarlıq” küləyin sürəti ilə bağlıdır:
" Əslində burada yenilik yoxdur. Təzə terminlərdən mövcud iqlim şəratini ifadə vasitəsi kimi istifadə edirlər. Küləyin nə sarısı, nə qırmızısı?!. Küləyin sürəti 15 m/saniyədən sonra güclü sayılır. İyulun 11-i üçün qeyd edilən göstərici isə elə də böyük deyil. Bunlar hər gün təkrarlanan iqlim dəyişikliyidir. Ümumiyyətlə, Bakı insan məskəni üçün o qədər də yararlı şəhər deyil. Orta əsr mənbərlərində səyahətçilərə istinadən qeyd edilir ki, Badi-kubəyə çatanda oranı tez tərk etməyə çalışıblar. Külək, tozlu hava maneələr yaradıb karvanların hərəkətinə. Abşeron yarımadasının iqlimi mülayim isti və subtropikdir, səhra, yarımsəhra iqlimidir. Buranın nə su ehtiyatı olub, nə də ərzaq baxımından yararlı sayılıb. Bakının iqlimi də insanlar üçün, yaşayış üçün münasib deyil. Havanın təzyiqi gün ərzində bir neçə dəfə dəyişir. Bu isə uyğun iqlim şəraiti hesab edilmir. Son illərdə vəziyyət bir az da kəskinləşib. Hündürmərtəbəli binalar çoxalıb, yaşıllıqlar azalıb, avtomobillər çoxalıb, əhali artıb, onsuz da səhra, yarımsəhra iqlimə malik ərazi səhralaşmağa doğru gedir. Şəhərdə havanın yüngülləşməsi üçün heç bir tədbir görülmür, vəziyyət getdikcə pisləşir". Ekoloq qeyd etdi ki, “sarı xəbərdarlıq” əhalini təhlükəsizlik tədbirlərinə riayət etməyə çağırışdır:
" Bu xəbərdarlığı ona görə edirlər ki, ağaclar avtomobillərin üzərinə düşə bilər, yüngül konstruksiyalar aşa bilər, binalardan, eyvanlardan müxtəlif əşyalar piyadaların üzərinə düşə bilər və sair. Küləkli havalarda əhali ehtiyatlı olmalıdır, özünü və ətrafdakıları qorumalıdır".
