Oğuzda 11 yaşlı qız yelləncəyin ipinə dolanaraq boğulub.
Hadisə bu gün axşam saatlarında rayonun Yemişənli kəndində baş verib.
Belə ki, həmin kənd sakini, 2013-cü il təvəllüdlü Firuzə Nəbi qızı Qəribova yaşadığı evin həyətində yelləncəkdə yellənərkən onun ipi boğazına dolanıb və azyaşlı boğularaq ölüb.
Hadisə yerinə hüquq-mühafizə orqanlarının əməkdaşları cəlb olunub.
Faktla bağlı araşdırma aparılır.
Sosioloq Mətanət Məmmədova "Sherg.az"a bildirib ki, bu hadisələrin hər biri valideyn diqqətsizliyindən irəli gəlir:
“Xüsusilə də ananın uşağa qarşı diqqətsizliyi pis hadisələrlə nəticələnir. 11 yaşlı uşaq yelləncəkdə yellənərkən yəqin ana da içəridə hansısa işlə başını qatırmış. Azyaşlı uşaqlara hər dəqiqə nəzarət edilməli və diqqət göstərilməlidir. Bunların hər birinin səbəbini smartfon telefonlarda və seriallarda görürəm. Bəzi analar səhərdən axşama qədər ev işlərini də kənara ataraq meyillərini telefona və sosial şəbəkələrə salırlar. Bu davranışların nəticəsində əlbəttə ki, xoşagəlməz hadisələr yaşanacaq. Yelləncəkdə boğulub ölən uşaq yəqin ki, 1 saatdan artıq nəzarətsiz qaıb və bu vəziyyət yaranıb. Belə valideynlər ciddi cəza tədbirlərinə layiq görülməlidirlər. Cəzalar olmasa cəmiyyətimizdə dəqiqə başı uşaq ölümləri ilə rastlaşacıq. Bəzi valideynlər məsuliyyətlərini itiriblər. Sanki uşaq onlar üçün ikinci dərəcəli və əhəmiyyətsizdir. Seriala, instagrama və tik tok a baxmağı uşaqdan üstün tuturlar. Düşünə bilmirəm ki, bu ana özünü necə bağışlayacaq”.
