Dünyada və Türkiyədə hər üç uşaqdan ikisində omeqa-3 səviyyəsinin yetərli olmadığı bildirilir. Mütəxəssislər uşaqların sağlam inkişafı üçün bir yaşından etibarən həftədə ən azı iki dəfə yağlı balıq yeməsini tövsiyə edirlər.
Sherg.az xəbər verir ki, Anadolu Agentliyinin məlumatına görə, Cemil Taşcıoğlu Şəhər Xəstəxanasının Uşaq Sağlamlığı Klinikasının təlim rəhbəri, professor Vefik Arıca uşaqlarda omeqa-3 çatışmazlığının geniş yayıldığını bildirib.
Onun sözlərinə görə, son araşdırmalarda hər üç uşaqdan ikisində omeqa-3 səviyyəsinin aşağı olduğu müəyyən edilib. Dünyada adambaşına illik balıq istehlakı 21 kiloqram olduğu halda, Türkiyədə bu göstərici 7,7 kiloqramdır.
Professor qeyd edib ki, omeqa-3 çatışmazlığı ürək-damar xəstəlikləri, qaraciyər yağlanması, neyroinkişaf problemləri, yaddaş və diqqət pozuntuları, eləcə də bəzi göz xəstəlikləri ilə əlaqəli ola bilər.
Arıca beyin və göz toxumalarının inkişafı baxımından omeqa-3-lə yanaşı, xolin qəbulunun da əhəmiyyətini vurğulayıb. Onun sözlərinə görə, yumurta sarısı xolinlə zəngin qidalardandır. Balıq yağı ilə yumurta sarısının birlikdə qəbulu bu maddələrin orqanizmə daxil olmasına kömək edə bilər.
Mütəxəssis həftədə iki dəfə balıq yeyə bilməyən uşaqlarda omeqa-3 əlavələrinin həkimlə məsləhətləşdikdən sonra nəzərdən keçirilə biləcəyini bildirib. O, xüsusilə tərkibində xolin olan məhsullara diqqət çəkib.
Arıca balıq yağı əlavəsi seçərkən məhsulun tərkibinin, istehsal şəraitinin və etibarlılığının yoxlanılmasını tövsiyə edib. IFOS kimi beynəlxalq sertifikatların, son istifadə tarixinin, məhsulun qoxu və rənginin, eləcə də oksidləşmə əlamətlərinin nəzərə alınmasının vacibliyini qeyd edib.
Professorun sözlərinə görə, omeqa-3 qəbulunda miqdar da önəmlidir. O, Ümumdünya Səhiyyə Təşkilatının sağlam uşaqlar üçün gündəlik DHA və EPA cəmi üzrə 250 milliqram tövsiyə etdiyini bildirib.
Mütəxəssis balıq yağı əlavələrinin həddindən artıq qəbulunun mədə-bağırsaq problemləri, yağlı nəcis və allergik reaksiyalar yarada biləcəyi barədə xəbərdarlıq edib.
Arıca uşaqların qidalanmasında omeqa-3-lə zəngin, civə səviyyəsi aşağı olan balıqlara üstünlük verilməsini məsləhət görüb. O, xüsusilə qızılbalıq, sardina və hamsini tövsiyə edərək valideynlərə uşaqlarına bir yaşından etibarən həftədə ən azı iki dəfə yağlı balıq verməyi məsləhət görüb.