Gürcüstanın Baş Prokurorluğu Bolnisidə iki azərbaycanlı yeniyetmənin ölümü ilə nəticələnən qəzanı törətmiş şəxsə qarşı ittiham irəli sürüb.
Teleqraf.com xəbər verir ki, bu barədə Baş Prokurorluğun yaydığı məlumatda bildirilib.
İstintaqla müəyyən edilib ki, dekabrın 30-da Bolnisi rayonunda avtomobili idarə edən şəxs ehtiyatsızlıq göstərib, nəqliyyat vasitəsinin təhlükəsiz idarəsini təmin edə bilməyərək iki yeniyetmə ilə toqquşub. Nəticədə həmin şəxslər aldıqları xəsarətlərdən hadisə yerində dünyalarını dəyişiblər.
“İttiham olunan şəxs elə həmin gün saxlanılıb. Ona qarşı Cinayət Məcəlləsinin iki nəfərin ölümünə səbəb olan yol hərəkəti və nəqliyyat vasitələrinin istismarı qaydalarının pozulması maddəsi üzrə ittiham irəli sürülüb. Baş Prokurorluğun vəsatəti ilə məhkəmə ittiham olunan şəxs barəsində həbs qətimkan tədbiri seçib. Cinayət işinin istintaqı davam etdirilir”, - məlumatda deyilir.
Qeyd edək ki, Bolnisi rayonunun soydaşlarımızın yaşadığı Naxiduri (Arıxlı) kəndində baş vermiş avtoqəzada 15-16 yaşlı Elçin Binnətov və Sinan Şərifov dünyasını dəyişib.
