Almaniyada vaxtından əvvəl Bundestaq (parlament) seçkiləri başlayıb.
APA xəbər verir ki, bu gün səhər saat 08:00-da (yerli vaxtla) ölkə üzrə seçki məntəqələri açılıb.
Seçkilərin əsas detalları:
Deputat yerləri:
Bundestaqdakı 630 yer uğrunda 4 506 namizəd mübarizə aparır ki, onların təxminən üçdə biri qadınlardır.
Səsvermə hüququ:
Təxminən 59,2 milyon Almaniya vətəndaşı səsvermə hüququna malikdir və onlar parlamentin gələcək tərkibini müəyyən edəcəklər.
Seçki sistemi:
Almaniyada qarışıq seçki sistemi tətbiq olunur, burada majoritar və proporsional prinsiplər birləşdirilir. Deputatların yarısı 299 seçki dairəsində birbaşa səsvermə yolu ilə, digər yarısı isə partiya siyahıları üzrə seçilir. Hər seçici iki səsə malikdir: biri namizədə (birbaşa mandat), digəri isə partiya siyahısına verilir. Partiyaların Bundestaqdakı mandatlarının sayı partiya siyahıları üzrə səsvermənin nəticələrini əks etdirməlidir.
İştirak edən partiyalar:
Cari seçkilərdə 29 partiya iştirak edir, lakin real olaraq yalnız Xristian Demokratik və Xristian Sosial İttifaqları (CDU/CSU), Almaniya Sosial Demokrat Partiyası (SPD), "Yaşıllar", "Almaniya üçün Alternativ" (AfD), Sol Partiya, Azad Demokratik Partiya (FDP) və "Sahra Vagenknecht İttifaqı - ağıl və ədalət uğrunda" (BSW) partiyalarının parlamentə düşmək şansı var.
Seçki məntəqələrinin iş vaxtı:
Seçki məntəqələri saat 18:00-dək (yerli vaxtla) açıq olacaq. Məntəqələr bağlandıqdan dərhal sonra ARD və ZDF telekanalları exit-poll nəticələrini dərc edəcək və siyasi partiyaların nümayəndələrinin ilk şərhləri gəlməyə başlayacaq. Federal Seçki Komissiyasının ilkin rəsmi nəticələri bazar ertəsi gecəsi, yekun nəticələr isə sonrakı günlərdə açıqlanacaq.
Sosioloji proqnozlar:
Sosioloji institutların proqnozlarına görə, CDU/CSU bloku təxminən 29-30% səs toplayaraq inamlı qələbə qazana bilər. "Almaniya üçün Alternativ" partiyası isə 20-22% səs toplayaraq ikinci yeri tuta bilər ki, bu da 2021-ci il seçkiləri ilə müqayisədə iki dəfə çoxdur. Sosial-demokratlar isə yalnız üçüncü yeri tuta bilər və onların reytinqi 15-16% təşkil edir. SPD-nin 2021-ci il seçkiləri ilə müqayisədə seçicilərinin üçdə birini itirəcəyi gözlənilir.
Seçkilərdən sonra partiyalar, xüsusilə qalib gələn partiya, yeni hökumətin formalaşdırılması üçün koalisiya danışıqlarına başlayacaq. Bu prosesdə əvvəlcə tərəfdaşların hökumətdə iştirak etməyə hazır olub-olmadığını müəyyən etmək üçün ilkin danışıqlar aparılacaq, daha sonra isə koalisiya müqaviləsinin əsasını təşkil edəcək proqramlar üzrə detallı müzakirələr keçiriləcək.
