"Sosial media, qloballaşma, rəqəmsal inkişaf ailə dəyərlərinin aşınmasına gətirib çıxarır".
Teleqraf xəbər verir ki, bunu Türkiyənin ailə və sosial xidmətlər naziri Mahinur Özdemir Göktaş Türk Dövlətləri Təşkilatının üzv və müşahidəçi dövlətlərinin yüksək səviyyəli nümayəndə heyətlərinin iştirakı ilə “Güclü ailələr, güclü toplumlar: TDT ölkələrində ailəni dəstəkləyici siyasətlər” adlı tədbirdə çıxışı zamanı deyib.
"Millətlərin istiqbalı ailə dəyərlərinə bağlıdır. 2025-ci ilin Türkiyədə "Ailə ili" elan edilməsi ailəyə verilən önəmin göstəricisidir. Ötən il Türkiyədə ilki gerçəkləşən bu tədbiri qloballaşan dünyada ailəmiz-istiqbalımız adı altında həyata keçirmişdik. Məqsədimiz ölkələrimizdə qarşılaşdığımız problemlər haqda ortaq həllər axtarmaqdır. Bu gün qloballaşma, rəqəmsal inkişaf dəyərlərin aşınmasına gətirib çıxarır. Evlilik yaşının, boşanmaların artması bir çox cəmiyyətlərin ortaq problemidir. Sosial media və fərqli ideologiyalar bu prosesi sürətləndirir. Bütün bu nəticələr hamımızın gələcəyinə təsir edir və bu problemlərə bir bütün şəklində yanaşmalıyıq. Dövrün tələblərinə uyğun siyasi həllər tapmaq bu günün əsas məsələsidir. Düşünürəm ki, ailə anlayışını yenidən formalaşdırmalıyıq".
Bu barədə “Sherg.az”a danışan Sağlam Cəmiyyət Hərəkatının rəhbəri, sosioloq Elçin Bayramlı bildirib ki, Qlobal təşkilatlar tərəfindən 20-30 ildir ki, bu layihə aparılırdı:
“İk növbədə də Türkiyə cəmiyyəti, mənəvi cəhətdən məhv edildi, bütün ailə institutu darmadağın edildi, əxlaqsızlıq maksimuma çatdırıldı. Müxtəlif proqramlar adı altında qadın azadlığı, gender proqramları, uşaq azadlığı adlar altında cəmiyyət mənəvi olaraq məhv olunub. Bu proses 20 ildən çoxdur davam edir. Artıq yekunlaşmaq üzrədir. Mövcud olan bütün mənəvi dəyərlərimizi son dənəsinə qədər itirmişik. Yəni ortada artıq öyündüyümüz heç bir dəyər qalmayıb. Bu qlobal fondların, təşkilatların yetişdirdiyi zombi, cəmiyyət formasıdır. İllər öncə də qeyd etmişəm ki, seriallar, şou verilişlər, sosial şəbəkələrdəki vəziyyət bizim xalqı məhv edəcək. Bu gün sadəcə ətrafa baxmaq kifayətdir. Ölkəmiz boşanmalar üzrə dünya çempionudur. Sosial şəbəkələrdə murdar rəzil, əxlaqsız, şərəfsiz şəxslərə xalqımız dəstək verir. Ancaq faydalı elmi, sosial sağlamlıqla bağlı kanallara, səhifələrə, əhəmiyyət verən olmur. İnsanlarımız əxlaqsızlıq qəbul olunan şeyləri indi normal qəbul edir. Artıq bu mövzuları danışmağın mənası yoxdur. Çünki nə cəmiyyət, nə də hökumət öz milli mənəvi dəyərlərini, hətta öz ana dilini belə qorumaq istəmir, öz milli mədəniyyətimizi, toylarımızı, ənənələrimizi, yaşatmırıq, dəyərlərimizin hamısını itiririk və adını isə müasirlik qoymuşuq. Artıq bundan o yana uçurumdu, bundan o yana bir millətin məhv olmasıdır. Ailə quranların və uşaq doğumlarının sayı sürətlə azalır”.
