Super Liqa nəhəngi “Beşiktaş”la 9 yanvar 2024-cü ildə müqavilə imzalayan və 16 oyundan sonra 13 aprel 2024-də vəzifəsindən kənarlaşdırılan Fernando Santos, daha sonra Azərbaycan Millî Komandasının sükanı arxasına keçmişdi.
Lakin təcrübəli mütəxəssisin Azərbaycandakı macərası da uğursuzluqla yadda qaldı.
Sherg.az xəbər verir ki, Azərbaycan Futbol Federasiyası (AFFA) Portuqaliyalı çalışdırıcı ilə yolların ayrıldığını açıqlayıb. Federasiyanın məlumatına görə, Santosun müqaviləsi qarşılıqlı razılaşma ilə ləğv edilib.
Millimizi 2026 FIFA Dünya Çempionatının Avropa seçmə mərhələsində Ukrayna ilə oyuna 21 yaşadək futbolçulardan ibarət yığmanın baş məşqçisi Ayhan Abbasov çıxaracaq.
Portuqaliyalı mütəxəssis Azərbaycan Millî Komandasının başında keçirdiyi 11 oyunda qələbə qazana bilməyib. Komanda bu görüşlərdə cəmi 4 qol vurub, əvəzində 29 qol buraxıb.
70 yaşlı çalışdırıcı 11 oyunda 2 heç-heçə, 9 məğlubiyyətlə kifayətlənib və orta hesabla 0.18 xal toplaya bilib.
