Alimlər bir araşdırma ilə sübut ediblər ki, insan beyni əvvəllər düşünüldüyündən 10 dəfə daha çox məlumat saxlaya bilir.
Sherg.az xəbər verir ki, əvvəlki araşdırmalar göstərib ki, beyində yeni məlumatların öyrənilməsi və yadda saxlanması sinaps adlanan sinir əlaqələrini gücləndirir. Bununla belə, fərdi sinapsların gücünü dəqiq ölçmək nevroloqlar üçün çətin bir iş olmuşdur.
"Neural Computation" jurnalında dərc olunan yeni texnika sinaptik güc və bu sinir əlaqələrinin nə qədər məlumat saxlaya biləcəyi haqqında yeni məlumatlar təqdim edir. Bu metodun beyindəki öyrənmə və yaddaş proseslərini daha yaxşı anlamağa kömək edə biləcəyi düşünülür.
“İndi biz sinapsların gücünü, bu gücü modulyasiya edən neyronların həssaslığını və sinapsların saxlaya biləcəyi məlumatın miqdarını araşdıran bir texnika qurduq və nəticədə beynimizin əvvəllər düşündüyümüzdən 10 dəfə daha çox məlumat saxlaya bildiyi qənaətinə gəldik. ", - tədqiqatın həmmüəllifi Terrence Sejnovski bildirib. Sejnovski, araşdırma sayəsində neyronların bir-birinə necə və harada bağlandığını daha yaxşı müəyyənləşdirdiklərini söyləyib.
BÜTÜN İNTERNET MƏLUMATLARINI SAXLAYA BİLƏR
Bu tapıntı, sinir əlaqələrinin gücləndirilməsinin yeni məlumatların kodlaşdırılmasına imkan verdiyi proses olan sinaptik plastikliyin əhəmiyyətini vurğulayır.
Tədqiqatçılar kompüterləri öyrənərkən tez-tez istifadə olunan bir metoddan istifadə edərək, nə qədər məlumat sinapslarının tuta biləcəyini müəyyən etdilər.
Siçovulun hipokampusunda cüt sinapsları araşdıraraq müəyyən etdilər ki, hər bir sinaps 4,1-4,6 bit məlumat saxlaya bilir. Bildirilib ki, 100 trilyondan çox sinapsa malik insan beynində ən azı bir petabayt məlumat yerləşə bilir ki, bu da bütün internet məlumatlarının saxlanmasına bərabərdir.
