Partiya sədri bəyan edib ki, erməni ictimaiyyətinin "məxməri inqilab"dan gözləntiləri özünü doğrultmadı: “Sıravi ermənilərin “inqilab lideri” saydıqları Paşinyanla bağlı ümidləri puç oldu. Çünki baş nazir seçki öncəsi seçicilərə verdiyi şirin vədlərin heç birini yerinə yetirə bilmədi. Paşinyan müxalifətdə olduğu dönəmlərdə Serj Sarkisyanı yıxmaq üçün effektiv və cazibəli şüarlara əl atırdı və bununla ictimaiyyətin diqqətini cəlb edə bilirdi. Ancaq Paşinyanın ilyarımlıq hakimiyyəti göstərdi ki, müxalifət lideri kimi sağa-sola qışqırıb bağırmaqla reytinq yığmaq ayrı, hakimiyyətə gəldikdən sonra ölkəni real idarə etmək isə tamamilə fərqli müstəvilərdir. Paşinyan hakimiyyətə gəldikdən sonra öz parlaqlığını, cazibəsini itirdi. O, ölkəni idarə etməyi bacarmır. Erməni ictimaiyyəti baş nazirə qarşı çox tələbkardır və ondan seçki öncəsi verdiyi şirnikləndirici, aldadıcı vədləri yerinə yetirməyi tələb edir. Son vaxtlar demək olar ki, hər gün erməni KİV-lərində Ermənistanın bu və ya digər yaşayış məntəqələrində mövcud hakimiyyətə qarşı etiraz aksiyalarının keçirilməsi haqda xəbərlərə rast gəlirik. Nikol Paşinyanın Ermənistanı krizisdən çıxarmaq və çiçəkləndirmək üçün imkanları və şansları sürətlə tükənir. Bu mənada Ermənistan Milli Razılıq Partiyasının lideri Aram Arutyunyanın Paşinyanın bəd ayaqda qeyri-adekvat addımlar atmağa hazır olması ilə bağlı səsləndirdiyi fikir tamamilə realdır”.
Ə.Hüseynov bildirib ki, Paşinyan olduqca sürüşkən və məsuliyyətsiz bir siyasətçidir:
“O, öz hakimiyyətinin ömrünü uzatmaq üçün istənilən üsula, hiyləyə əl ata bilər. Paşinyanın Amerikaya səfərə hazırlaşması da onun öz hakimiyyətini möhkəmləndirməsinə və erməni diasporunun dəstəyini qazanmağa hesablanıb. Ermənistan baş naziri sentyabrın 22-də ABŞ-ın Los-Anceles şəhərində ermənilər qarşısında çıxış etməyi planlaşdırır. Böyük dövlətlərdən və Qərbin iri maliyyə strukturlarından Ermənistanın inkişafı üçün maliyyə dəstəyi ala bilməyən Paşinyanın indi də sonuncu ümid yeri ABŞ-dakı mütəşəkkil erməni diasporudur. Ancaq diasporun mümkün maliyyə dəstəyi də Paşinyanı xilas etməyəcək. Paşinyan gec-tez iflasa məhkumdur. Çünki bunu "məxməri inqilab"ın fəlsəfəsi qaçılmaz və labüd edir. O ki qaldı erməni xalqının yenidən “Qarabağ klanı”na dəstək verməsi ehtimalına, bəli, nəzəri baxımdan götürsək, bu versiyanın reallaşması mümkündür. Ancaq praktiki cəhətdən mümkün deyil. Çünki hazırki Ermənistan ictimaiyyətində Sarkisyan-Koçaryan cütlüyünün təmsil etdiyi "Qarabağ klanı"na qarşı dərin nifrət hissi formalaşıb. Odur ki, post-Paşinyan dönəmində Ermənistanın siyasi arenasında tamamilə yeni qüvvələrin ortaya çıxacağı gözlənilir”.
