Ermənistan baş naziri Nikol Paşinyanın son günlər verdiyi açıqlamalar diqqət çəkir. O, Azərbaycanın haqlı və güclü olduğunu, nəhayət ki, etiraf edir. Bunu baş nazirə 44 günlük müharibə dövründə ordumuz başa saldı. Qəhrəmanlarımız düşmənin silahlı qüvvələrini darmadağın etməklə həm də Ermənistan iqtidarının “gözünü açdı”.
Deməli, igid əsgər və zabitlərimizin qələbəsi təkcə hərbi deyil, eyni zamanda siyasi əhəmiyyət daşıyır. Həmin mərd oğullardan biri də 1998-ci il təvəllüdlü Hüseynzadə Muraddır.
O, Lənkəranın Şağlasər kəndində anadan olub. 2001-ci ildə Rafael Ağayev adına kənd orta məktəbində təhsil almağa başlayıb. 2016-cı ildə Naxçıvan Muxtar Respublikasının Şahbuz rayonunda hərbi xidmət keçib. Bir il sonra isə tərxis olunub.
Qardaşı Məhəmməd bəy qəhrəmanımız haqqında daha ətraflı “Sherg.az”a danışdı:
“O, Aprel döyüşlərində də iştirak etmişdi. Hərbi xidmətini başa vurduqdan sonra Lənkəran rayonundakı regional narkoloji dispanserdə işə başlayıb. Sentyabrın 28-də mühahibəyə yollanıb.
Oktyabrın 21-də Qubadlı uğrunda gedən döyüşlərdə ayağından yaralanıb. Lakin mübarizə aparmağa davam edib. Doqquz gün sonra, yəni oktyabrın 30-da isə boynundan aldığı qəlpə yarası nəticəsində şəhid olub.
Qardaşım həmişə şəhadət arzusu ilə yaşayırdı. Nəhayət, arzusuna çatdı. Murad “Vətən uğrunda”, “Cəsur döyüşçü”, “Cəbrayılın azad olunmasına görə”, “Qubadlının azad olunmasına görə” medalları ilə təltif olunub.
Digər şəhidlər kimi, mənim qardaşım da ölməyib. Bəqarə surəsində yazılır ki, Allah yolunda öldürülənlərə “ölü” deməyin, əksinə, onlar diridirlər, lakin siz bunu dərk etmirsiniz”.
