"Hər gün 30 dəqiqə idman və tənəffüs hərəkətləri edin"
Koronavirus immuniteti zəif olan insanlara daha tez yoluxur və onlar bu xəstliyi digərlərinə nisbətən daha ağır keçirirlər. Bu səbəbdən həkimlər bu aralar daha çox imuniteti gücləndirmək üçün məsləhətlər verirlər.
Amma immuniteti zəiflədən səbəblərdən biri insanların daha çox stress altında, qorxu içində, panikada olmalarıdır. Bir tərəfdən pandemiya mühitinin yaratdığı qorxu, o biri tərəfdən insanların karantin rejimində yaşadıqları stress, digər tərəfdən sosial şəbəkələrdə əsası olan və olmayan xəbərlərin yayılması, eyni zamanda isə son günlər ictimai-siyasi həyatda yaşanan fərqli fikirli insanlar üzərində olan basqılar insanların ruh halına, dolayısı ilə imunitetinə təsir edir.
“Virtual Hospital” tibb qrupunun təsisçisi Müşfiq Bəbirov isə hesab edir ki, Koronavirusun yaratdığı panika onun özündən qat-qat təhlükəlidir. Panika, stress, qorxu, həyəcan immun sistemini zəiflədən amillərdir. Virusa qarşı isə yalnız güclü immun sistemi lazımdır:
![](https://sherg.az/uploads/editor/c4db088b389b7a829ca017b02c2cd338.jpg)
“Virusun vahiməsi əksər insanlarda boğulma, təngnəfəslik yaradıb. Hər kəs özündə koronavirus olduğundan şübhələnir və dərin psixoloji sarsıntı keçirir. Bu da durduq yerdə nəfəs darlığı, boğulma, çətin nəfəsalma kimi əlamətlər verir. Ona görə də, neqativ xəbərlərdən uzaq durun. Lazım gəlsə sosial şəbəkələri telefondan silin. Neqativ xəbər yayan dostlarınızı blok edin. Bilin ki, statistika 80 faiz yüngül xəstələnmə göstərir. Əgər başınız qarışanda tənəffüs normal olursa və ya yalnız stresə düşəndə və xəstəlik barədə fikirləşəndə boğulma olursa, amma adi vaxtda olmursa bilin ki sizdə həyəcan və təşviş pozuntusu var. Tək bu əlamətlərlə CoVId 19 xəstəlik təyin olunmur. Hər gün 30 dəqiqə idman və tənəffüs hərəkətləri edin. Nəfəsinizi burunla alıb 10 saniyə saxlayın və ağızla verin. Bunu gündə 20-30 dəfə edin. Otağa qapanmayın. Balkona çıxın, həyət evidirsə həyətə çıxın. Bir sözlə açıq havada çox olun. Evin havasını hər gün dəyişin. Şəxsi gigiyenaya əməl edin. Evdən çölə məcbur qalmadıqca çıxmayın. Çıxsanız belə məsafə saxlayın və çöldə çox vaxt keçirməyin”.