Ali Baş Komandan İlham Əliyevin təsdiq etdiyi plana əsasən Azərbaycan Ordusunda qoşun növlərinin hərbi təlimləri davam etdirilir. Təlimdə 15000 nəfərədək şəxsi heyət, 300-dək tank və digər zirehli texnika, 400-dək müxtəlif çaplı raket və artilleriya qurğusu, yaylım atəşli reaktiv sistemləri, minaatan və tank əleyhinə vasitələr, 50-dək hərbi aviasiya və müxtəlif təyinatlı pilotsuz uçuş aparatları iştirak edir.
Ordumuzun Türkiyənin Konya şəhərində keçirilən “Anatolian Phoenix-2021” beynəlxalq axtarış-xilasetmə təlimi də davam edir. Azərbaycan Müdafiə Nazirliyinin məlumatına görə, beynəlxalq təlimdə paraşüt hazırlığı üzrə məşqlər keçirilib.
Məşqlərin keçirilməsində əsas məqsəd şəxsi heyətin paraşütlərdən istifadə vərdişlərinin təkmilləşdirilməsi, həmçinin onların döyüş və xüsusi hazırlıq səviyyəsinin daha da artırılmasıdır. Təlim iyunun 4-dək davam edəcək.
Qarabağ qazisi, ehtiyatda olan gizir Natiq Mehdiyev sözügedən təlimlərin əhəmiyyətini “Sherg.az”a şərh edib:
“Belə bir deyim var: “Təlimdə tər tökən, döyüşdə qan tökər!”. Müharibədə əldə etdiyimiz nailiyyətlər də məhz hərbi təlimlərimizin nəticəsidir. Təlimlər əsgər və zabitlərimiz üçün sağlamlıqdır, həmçinin döyüş bacarığının artırılması deməkdir. Torpaqlarımızı azad etdik, lakin hər zaman döyüş qabiliyyətimizi saxlamalıyıq. Bunun üçün də Ali Baş Komandanımız müvafiq plan təsdiq edir ki, hərbi qulluqçularımız təlimlərə qatılsınlar. Bu təlimlərin bütün üstünlüklərini həm Aprel döyüşləri, həm də İkinci Qarabağ savaşında gördük. Fürsətdən istifadə edib, bütün hərbçilərimiz, əsgərlərimiz, zabit və generallarımıza uğurlar arzu edirəm. Ümid edirik ki, bu təlimləri alnıaçıq başa vuracaqlar. Bütün hərbçilərimizə güvənirik!”.
