Noyabrın 22-də Tokioda Yaponiya Xarici İşlər naziri Toşimitsu Moteqi türkiyəli həmkarı Mövlud Çavuşoğlu ilə iki ölkə arasında qarşılıqlı maraq doğuran məsələləri müzakirə edib.
Əvvəlcə T.Moteqi G20 ölkələri Xarici İşlər nazirlərinin görüşündə iştirak etmək üçün Tokioya gələn həmkarını Yaponiyanın “Doğan Günəş” ordeni ilə təltif olunması münasibətilə təbrik edib.
Yüksək mükafata görə minnətdarlığını bildirən M.Çavuşoğlu bundan sonra da ikitərəfli münasibətlərin inkişafı üçün səylərini əsirgəməyəcəyini deyib.
Görüşdə ikitərəfli əlaqələr, Yaponiya ilə Türkiyə arasında iqtisadi tərəfdaşlıq barədə razılaşma (EPA) ilə bağlı danışıqların gedişi ilə əlaqədar fikir mübadiləsi aparılıb. Nazirlər təbii fəlakətlər zamanı risklərin azaldılması məqsədilə qarşılıqlı əməkdaşlığın dərinləşdirilməsi istiqamətində fəaliyyətin artırılmasının vacibliyini qeyd ediblər.
Regional məsələlər barədə fikir mübadiləsi aparan tərəflər Yaxın Şərqdə vəziyyət barədə də danışıblar. T.Moteqi bildirib ki, Yaponiya Suriyada siyasi proseslərdə əldə edilən tərəqqini yüksək qiymətləndirir və Türkiyə daxil olmaqla bütün tərəflərin Suriya böhranının aradan qaldırılması, humanitar vəziyyətin yaxşılaşdırılması istiqamətində səylərinin əhəmiyyətini xüsusi qeyd edir.
