Rusiya yaxın müddət ərzində Ukrayna ərazilərindən çəkilmək məcburiyyətində qalacaq
Prezident Volodimir Zelenskinin administrasiyası Ukraynanın əks-hücuma başladığını təsdiqləyib. Bu barədə Ukrayna Prezident Administrasiyası rəhbərinin müşaviri Mixail Podolyak bildirib. O deyib ki, Ukrayna Silahlı Qüvvələrinin əks-hücum əməliyyatı bir neçə gündür ki, davam edir:
"Artıq bir neçə gündür əks-hücum gedir, sərhədin 1500 kilometrliyində gərgin müharibə gedir, hücumlar artıq başlayıb". Podolyak Ukraynanın Rusiya ərazisinə qarşı Qərb silahlarından istifadə etməyəcəyini, lakin Krımı və Donbası azad etmək üçün Rusiya ordusuna qarşı bu silahlardan istifadə ediləcəyini vurğulayıb. Bu arada “Vaqner” muzdlu qrupu öz bölmələrini Baxmutdan çıxarmağa başlayıb. Görüntülərdə “Vaqner”in rəhbəri Yevgeni Priqojin döyüşçülərinə istirahət edərək növbəti tapşırıqlara hazırlaşacaqlarını deyir. Qeyd edək ki, Yevgeni Priqojin ötən gün müsahibəsində Baxmutda 10 mini keçmiş məhbus olmaqla ümumilikdə 20 min döyüşçü itirdiyini açıqlayıb.
Beynəlxalq Münasibətlər və Diplomatiya Araşdırmaları Mərkəzinin sədri, politoloq Samir Hümbətov "Sherg.az"a deyib ki, Ukraynanın əks-hücum əməliyyatları dərinləşərsə, təzyiqlər artarsa, Rusiya yaxın müddət ərzində Ukrayna ərazilərindən çəkilmək məcburiyyətində qalacaq. Ekspert düşünür ki, indiki məqamda Qərb ölkələrinin Ukraynaya hərbi silah-sursat dəstəyi verməsi xüsusi əhəmiyyət daşıyır: "Əks-hücum əməliyyatları daha çox silah-sursat, hərbi texnika və canlı qüvvə tələb edir. Ukrayna canlı qüvvə və hazırlıqlı hərbçilər baxımından problem yaşamır. Məlumatlara görə, Almaniya, Polşa, Böyük Britaniyada ruslarla döyüşmək üçün hərbçilər yetişdirilir. O baxımdan indi əsas məsələ hərbi texnika ilə təchizatdır. ABŞ və Avropa ölkələrinin Ukraynaya davamlı hərbi yardımı yüksələn xətlə davam edəcək. Çünki 1500 km.lik cəbhə xətti kifayət qədər böyükdür. Ukrayna qüvvələri ciddi üstünlük əldə edərsə, bu, psixoloji üstünlük də yaradacaq və müharibənin taleyini həll edəcək".
