İsveçdə kriminal qruplaşmalar minlərlə gənci “Swish” adlı mobil proqram əlavəsindən istifadə etməklə pulların yuyulmasına cəlb ediblər. AZƏRTAC İsveç KİV-lərinə istinadla xəbər verir ki, İsveçdə yaradılmış mobil proqram əlavəsinin köməyi ilə pulların yuyulmasına görə məhkum olunmuş insanların əksəriyyəti 15-25 yaşlarında gənclərdir.
Başqa insanların mobil telefon nömrələrindən istifadə etməklə, bank hesablarından pul köçürməyə imkan verən bu proqram əlavəsi adi vətəndaşlarla yanaşı ölkənin kriminal dairələrində də çox populyardır. Mövcud qanunvericiliyin pozulmasına görə mühakimə olunanların və şübhəli şəxslərin çoxu bildirib ki, kriminal qruplaşmalar onlara təzyiq göstərir, hədələyir və ya cinayət törədilməsi müqabilində pul ödəyirdilər. Bu sxem o qədər geniş yayılıb ki, hazırda İsveçdə təqribən beş min gənc pulların yuyulmasında şübhəli bilinir.
Qeyd edək ki, İsveç nağdsız hesablaşmaların həcminə görə çox vaxt dünyada ən üstün cəmiyyət hesab edilir. Krallıqda nağd pul dövriyyəsindən praktiki olaraq tamamilə imtina edildiyi üçün burada pul vəsaitlərinin elektron ödənişlərinin və köçürmələrinin müxtəlif növləri çox populyardır. Lakin İsveç polisinin bu yaxınlarda dərc edilmiş hesabatında göstərilir ki, kriminal qruplaşmalar tərəfindən belə platformalardan istifadə edilməsi faktlarının artması təşviş doğurur.
