Azərbaycanın xarici işlər naziri Ceyhun Bayramovla Rusiyanın xarici işlər naziri Sergey Lavrov arasında dünən telefon danışığı baş tutub. Bununla bağlı Azərbaycan XİN məlumat yayıb. Nazirlər Azərbaycan-Ermənistan dövlət sərhədində mövcud olan vəziyyəti və üçtərəfli bəyanatların icrası ilə əlaqədar məsələləri, o cümlədən bölgədə iqtisadi və nəqliyyat əlaqələrinin açılması ilə bağlı üçtərəfli işçi qrupunun fəaliyyətinə dair məsələləri müzakirə ediblər.
Tərəflər, eyni zamanda ikitərəfli əməkdaşlıq gündəliyinə daxil olan məqamlar, o cümlədən beynəlxalq təşkilatlar çərçivəsində əməkdaşlıq üzrə fikir mübadiləsi aparıblar. Nazirlər, həmçinin qarşılıqlı maraq doğuran digər məsələlər haqqında danışıblar.
Politoloq, siyasi elmlər doktoru Cümşüd Nuriyev tərəflər arasındakı müzakirə barədə “Sherg.az”a fikir bildirdi:
“Bildiyiniz kimi, hazırda sərhədlərin delimitasiyası və demarkası prosesi gedir. Ermənistan yaxşı bilir ki, son otuz ildə işğalda saxladığı torpaqlar əslində onun deyil. İkinci bir tərəfdən, rus qoşunlarının Qazaxda yerləşməsi mütləq Azərbaycanın razılığı ilə olmalıdır. Amma hələlik belə bir razılıq yoxdur. Qazağın kəndlərinin qaytarılması isə artıq gündəmdədir. Bu barədə Ermənistan parlamentində də müzakirə edilir. Fikrimcə, nazirlər sözügedən məsələ barədə danışıblar”.
C.Nuriyev, həmçinin digər müzakirə predmetlərini də sadaladı:
“Rusiyada müxalifət partiyasının sədri Vladimir Jirinovski verdiyimiz notadan sonra yenə təxribat törətdi. O, bu dəfə də Azərbaycanın qələbəsinə kölgə salmağa cəhd etdi. Çox güman, Ceyhun Bayramov bu məqamı da unutmayıb. Eyni zamanda 11 yanvarda imzalanan üçtərəfli bəyanatın şərtlərinin icrasını da öhdəlik götürən tərəfə, yəni Moskvaya xatırladılması istisna deyil. Bütün hallarda, əlbəttə, Ceyhun Bayramov telefon danışığından əvvəl dövlət başçısından xüsusi tapşırıqlar alıb. Və onun qaldırdığı məsələlərdə də əvvəlcədən razılaşdırılıb”.
