Əgər Ukrayna müharibədə qələbə çalarsa və ərazi bütövlüyünü təmin edərsə, rus elitası sözünü deyəcək
Rusiyada növbəti prezident seçkiləri 2024-cü ilin mart ayında keçiriləcək. 2020-ci ildə keçirilən referendumun nəticələrinə görə, hazırkı Prezident Vladimir Putinin prezidentlik müddətləri sıfırlandığından onun yenidən namizəd olmaq şansı var. Kremlin mətbuat katibi Dmitri Peskov bildirib ki, Putin 2024-cü ildə prezidentliyə namizədliyini irəli sürsə, heç kim onunla rəqabət apara bilməyəcək:
"Putin hələ ki, özünün namizədliyini irəli sürəcəyini açıqlamayıb, amma namizədliyini irəli sürərsə, heç kim onunla rəqabət apara bilməyəcək. Putin əhalinin mütləq dəstəyinə malikdir". Peskov bildirib ki, Kremldə prezident seçkilərinə hazırlıq hələ başlamayıb. Onun sözlərinə görə, qarşıdan gələn prezidentlik kampaniyasının mənasını həm xarici gündəm, həm də Rusiya cəmiyyətinin inkişaf mərhələsi diktə edir. Putin özü prezident seçkilərində namizəd olub-olmayacağına dəqiq aydınlıq gətirməyib. Deyib ki, qanunvericiliyə görə, prezident seçkilərinin keçirilməsi barədə qərarı parlament ilin sonunda qəbul etməlidir: "Qərar qəbul ediləndə, seçkilər və onun tarixi elan olunanda bu barədə danışarıq".
Politoloq Məhəmməd Əsədullazadə "Sherg.az"a açıqlamasında bildirib ki, gələn il keçiriləcək prezident seçkisində V.Putinin yenidən namizəd olmaq şansı var. Analitik vurğulayıb ki, bu məsələ də daha çox Rusiya-Ukrayna müharibəsinin nəticəsindən asılıdır:
"Ümumiyyətlə, Rusiyada seçki institutu yoxdur. Seçki elita daxilində baş tutur və formal xarakter daşıyır. Rusiya bir imperiyadır və demokratik seçkilər imperiyanın siyasi maraqlarına uyğun gəlmir. Əgər Ukrayna müharibədə qələbə çalarsa və ərazi bütövlüyünü təmin edərsə, rus elitası, dərin dövlət Putini yenidən prezident postuna gətirməyəcək. Müharibənin davam edəcəyi təqdirdə Kreml rəhbəri öz vəzifəsini qoruyacaq. Putinin siyasi rəqibləri olub, amma onlar ya xaricdə sürgündə, ya da həbsdədir. "Putinin alternativi yoxdur" kimi ifadələr onun əvəzolunmaz şəxs kimi cəmiyyətə sırınmasına hesablanıb. Problem isə ondadır ki, rus cəmiyyəti siyasətdən xeyli uzaqdır və Kremldə gedən oyunlarla maraqlanmır. Cəmiyyətdə hələ də eyforiyalaşmış, imperiyalaşmış düşüncə hökm sürməkdədir".
